Озып кеткен йыл Ногай районы бойынша Россия МВД боьлигининъ куллыкшысы Абдулсалим Адильхан увылы Яриковка уьстинликли болып оьтти. Ногай батырларынынъ арасында йыл сырагыларына коьре, ол «Йыл спортсмени — 2025» деген сыйлы атка тийисли болды. Абдулсалим – халклар ара классынынъ спорт мастери. Абдулсалим эм онынъ аьлейи Софият Яриковлардынъ акында мен коьп йыллар артта газетамыздынъ бетлеринде язган эдим.
Сол заман олар бир ярыста енъуьвши болып, ислейтаган полиция боьлигининъ атын данъклаткан эдилер. Буьгуьнлерде де Яриковлар ислерин уьстинликли бардырадылар. Спорт пан каьр шегуьвде, окувында уьстинликлерге олардынъ увылы Арслан-Али да етиседи. Ол эркли куьресуьв бойынша ярысларда катнасып, биринши орынларга тийисли болады, сога онынъ коьплеген Сый грамоталары шайыт. Абдулсалим Яриков оьтип кеткен 2025-нши йыл авыр атлетика бойынша озган коьп турнирлерде катнаскан. Йылдынъ басында савлай ногайлар арасында ашык турнир Ставрополь крайынынъ Нефтекумск районынынъ Коясыл авылында оьтти. Мунда Абдулсалим эки кеби бойынша биринши орынларды алды. Сондай турнирлер Шешен Республикасынынъ Каршыга авылында, Ставрополь крайынынъ Зеленокумск каласында, Краснодар каласында, Адыгея Республикасынынъ Майкоп каласында, Кизляр районынынъ Крайновка авылында оьттилер.
Бу ярысларда А.Яриков туьрли кеплери бойынша тек биринши орынларды алып турды. Крайновкада болган «Кавказ ойынлары» турнирде бизим яслар, «Ногай орда» деп команда туьзип, ортакшылык эттилер. Мунда олар байыр эм команда болып, биринши орынларды алдылар. Ногай яслары арасында спорттынъ авыр
кеплери бойынша турнирлер Коясыл, Каршыга авылында оьттилер, уьшинди турнир Иргаклы авылында увыт айдынъ ишинде озгарылаяк. Сонъ эстафетады бизим районымыз алады. Курал айда Терекли-Мектеб авылында доьртинши ярыс оьткермеге ниетленедилер. Абдулсалим Яриковтынъ айтувы ман, ясларды спорт пан аьвликтируьв керек.
Сол заманда оларга баска пайдасыз ислерге заман да калмас, аваслык та болмас. «Спарта» спорт клубында тренировкаларга юреди Абдулсалим, коьп яслар спорт пан каьр шегедилер, сол бек ийги деп ойлаймыз.
Янъы йылдынъ алдында Куьнбатар авылдынъ аькимбасы Замид Яриков йыл бойынша уьстинликлерге етискен ясларды белгиледи. Биринши деп Абдулсалим Яриковты онынъ коьрсетуьвлерине коьре сайладылар. Ога тапшырылган Сый грамотасында булай язылган: «2025-нши йылдынъ ишинде ногай батырлары арасында спорттынъ авыр кеплери бойынша Абдулсалим Яриков йыл спортсмени болган. Ол – 15 медальлерининъ иеси. Йигерлик, эрклик йораймыз, артка
карамай, аьли де бийикликке ымтылынъыз. Берк ден савлык, оьзинъизге сенимлик эм яркыраган енъуьвлер сагынамыз».
Савгаланганлардынъ арасында Ислам Аджимуратов (10 медальлерининъ иеси) эм Хансултан Баймурзаев (9 медальлерининъ иеси) бар. Аьли де алдыда коьп ярыслар, турнирлер болар. Сонда катнасып, бизим яслар тек енъуьвши болып кайтсынлар. Куьресуьвлер, сынаслар тек спорт ярысларда болып, аьр заманда да дослык биринши орынды алсын.
Гульфира Бекмуратова.
Суьвретте: А.Яриковка грамота тапшырув мезгили.