Тез арада Ногай район яшавшыларын янъы музей меканы ашылувы куьтеди. Сол – бек ийги хабар эм етимис, неге десе мунда халктынъ аьвелгисин, ата — бабаларымыздынъ кулланган алатларын коьрмеге болады.
Алдын Ногай районымызда аьрекет бардырган Уьлке танув музей меканында коьп экспонатлар салмага, коьрсетпеге амал йок эди, аьли алдыда мырсатлар коьп.
Соны ман байланыслы болып, газетамыздынъ алдынгы номеринде, музей етекшисининъ тилек салувы ман, биз Ногай район яшавшыларына соьзимизди караткан эдик, кайтаралайык, аьли де уьйде кулланувдан шыккан, атай, тетейлеримиздинъ яшавында орын алган алатлар бар болса, музейге бермеге амалынъыз бар. Сизинъ аьел баалыкларынъыз музейде коьп йыллар сакланып, тарих пен куьн сайын, мунда келгенлерди таныстырып тураяк.
Уьстимиздеги йылдынъ канътар айынынъ 20-ншы куьнинде Уьлке танув музейиндеги экспонатларга уьйкен юкли косым болды. Мунда С.Батыров атындагы саниятлар мектебининъ окытувшысы, оьзи де талаплы суьвретши Алтынбике Оьмирзак кызы Акбердиева халкымыздынъ шынты увылы, бек оьнерли аьдемимиз Сраждин Батыровтынъ оьз колы ман ясалган, туьрли ерлерде болган выставкаларда ортакшылык эткен, коьплеген дуныя суьвретшилерин, саният аьрекетшилерин сукландырган суьвретлерин, онынъ байыр алатларын тапшырган.
Энди сол асарлар, Сраждиннинъ кийимлери, байыр алатлары бизим янъы музей меканымызда орын алаяклар. Сондай баалыкларды Алтынбике Акбердиева бу куьнлерге дейим аман-эсен еткерген. Сол тувыл ма тарихти саклав деген де?!
Алтынбике Оьмирзак кызы коьп йыллардан бери ерли саниятлар мектебинде куллык этип, соны ман бирге коьплеген республикалык, эл кезегинде оьтетаган суьвретлер выставкаларында катнаскан, оьзи – Сраждин Батыровтынъ мерекели выставкаларын коьп ерлерде уйгынлавга да куьшин салып келген аьдем.
Биревге де ясыртын тувыл, сол шаклы йыллар Сраждиннинъ халкымызга калдырган асабалыгын аявлап саклав тынышлардан болмаган, олай дегеним, суьвретлер оьз боякларын саклар уьшин, тийисли ава шартлары керек болады, соларды туьзуьв – аьдемнинъ заманы эм мырсатлары. А Алтынбике Акбердиева болса, сол шартларды туьзип болган, ол Сраждин Батыровтынъ, халкымыздынъ алдында бек уьйкен савап казанды деп айтпага боламыз.
Оьзи де Сраждин мен ювык таныс эди, заманга карамай, талаплы суьвретши акында коьп ийги хабарлар айтпага да болады. Аьли оьзи музейге берген аьр бир алат акында кызыклы хабар да биледи. Буьгуьн, Алтынбике Оьмирзак кызынынъ сайлаган кесписине алаллыгы, тарихти сыйлавы аркалы музей фонды янъы экспонатларга бай болды.
Ногай район еринде аьрекет бардыратаган А.Тахо-Годи атындагы республикалык музейининъ филиалынынъ етекшиси Зульфия Сапарали кызы Отаровадынъ билдируьвине коьре, бу куьн Алтынбике Оьмирзак кызы Сраждин Батыровтынъ кырк суьвретин, он уьш акварель бояклы куллыкларын, доьрт кийим эскизлери эм байыр затларын берди. А.Акбердиевадынъ билдируьвине коьре, Сраждин Батыровтынъ халкымызга калдырган асабалыгы оьлшемсиз уьйкен. Аьли де онынъ ногай эм дагестанлы миллет кийимлерининъ, ярасыклыкларынынъ коьплеген эскизлери, суьвретлери (2021-нши йылдан алып) Бельгия еринде. Соларды Сраждиннинъ тул хатыны Аклия аькеткен. Сол алатлар Францияда, Бельгияда суьвретшидинъ 70- йыллык мерекесине багысланган выставкаларда коьрсетилгенлер.
– Мен билип, Сраждин Батыровтынъ 75-йыллык мерекесине Аклиядынъ Лондонда, сонъ Турцияда выставкалар уйгынламага ниети бар, оннан сонъ суьвретлер ногай
шоьлге кайтарылаяк, – дейди ол.
Сраждин Батыров. Ондай аьдемлер оьмирде бир тувадылар. Талаплы инсан. Бир неше юзйыллыклар аты халк арасында сакланаяк аьдем. Олардынъ атлары оьмирленер уьшин Алтынбике Оьмирзак кызындай аьдемлер болмага тийисли. Талапты аяган эм баалаган.
Галима Сагиндикова.
Суьвретте: Алтынбике Акбердиева ман Зульфия Отарова (экспонатлар музейге тапшырылганнан сонъ).