Дагестан РФ Савытлы Куьшлер мен контракт беркитуьв негизинде гражданларды аьскерлик службасы сырасында куллык этуьв мен кызыксындырув иси белсенли бардырылады. Контракт бойынша аьскерлик службасынынъ гражданларды тек тийисли келим алув эм социаллык гарантиялар ман пайдаланмага болатаганы ман кызыксындырмайды, ол эр йигитлеримизге элимиздинъ кавыфсызлыгын канагатлавга оьз уьлисин коспага амал береди.
Ногай районынынъ Нариман авыл яшавшысы Иса Нурманбетов контракт беркитуьв мен РФ Савытлы Куьшлер сырасында аьскерлик службасын оьтпеге токтасты. Оьзи ол Нариман авыл яшавшыларынынъ татым аьелинде тувып-оьскен, мунда А.Асанов атындагы орта мектебин окып битирген. Онынъ атасы Тимур Бекманбетович – Ногай районы бойынша Россия МВД кинологиялык службасынынъ тамада инспекторы, анасы Эльнара Васильевна – «Ногайский район» МР-нынъ
КЦСОН куллыкшысы.
2021-нши йылда Иса Нурманбетов парызлы аьскерлик борышын толтырувга шакыртылды. Эл алдында эр борышын толтырганнан сонъ, ол Москва каласында кыйын салатаган эди. Элимиздинъ япсарларын коршалавда турган бизим эрлеримиз, увылларымыз эм аданасларымыз ювык арада енъуьв мен кайтканын суьемиз.