Ис куьнделигине муниципалитеттинъ кайбир маьнели соравлары салынып, район парламентининъ председатели Алибек Менласановтынъ басшылыгы ман кезекли сессия болып озды. Онынъ исинде Россия МВД-нынъ Ногай районы бойынша боьлигининъ начальниги Ислам Турлавов, авыл поселениелер аькимбаслары эм ямагат организациялар ваькиллери ортакшылык эттилер.
Биринши болып Ногай районы бойынша Россия МВД боьлигининъ начальнигининъ «2025-нши йылда оперативлик-служебный аьрекетининъ сырагылары
акында» эсап беруьви акында бу ведомстводынъ Ногай районы бойынша штабынынъ начальниги Зиявдин Янгишиев шыгып соьйледи.
Депутатлар муниципалитетте ыхтыярсаклав органлар аьрекети акында эсап беруьвди бир тавыстан яклады.
Сонъ депутатлар ман «Ерли налоглар бойынша борышты, сол налоглар ман байланыслы пеня эм штрафлар бойынша борышларды ыслап калдырувга пайдалыгы йок деп санавга косымша негизлерди токтастырув акында» деген сорав ортага салынып ойласылды. Сол сорав бойынша район администрациясынынъ экономика эм уйгынлав-проектлик оьрленуьв боьлигининъ начальниги Кызбийке Тангаева шыгып соьйледи. Солай ок район Йыйынынынъ депутатлары «Ногайский район» МР администрация аппаратынынъ структурасын беркиттилер. Сол сорав бойынша билдируьв этти район администрациясынынъ муниципальлик службасы эм кадрлар бойынша бас специалисти Элина Отарова. Тагы да депутатлар «2026-ншы эм 2027-нши – 2028-нши йыллардынъ план ман белгиленген болжалынынъ бюджетине туьрленислер киритуьв акында» соравды беркиттилер. Сол сорав бойынша муниципалитет администрациясынынъ «Финанс боьлиги» МКУ начальниги Арслан Кусегенов шыгып соьйледи.
Район Депутатлар йыйынынынъ председатели Алибек Менласанов ДР «Ногайский район» МР Депутатлар йыйынынынъ 2026-ншы йылга Ис планына туьрленислер киритпеге маслагат берди. Депутатлар бир тавыстан бу соравды якладылар.
Эм 5-нши сессиясынынъ тамамында «Роман Алексеевич Задирей эм Денислам Баюевич Мусаевке (Коряков) байырлыкка турак уьйди коьширип беруьв акында» сорав ман «Ногайский район» МР администрациясынынъ ер соравлары эм муниципальлик муьлк бойынша боьлигининъ специалисти Лейла
Аджикова шыгып соьйледи. Йогарыда белгиленген баьри соравларды депутатлар бир тавыстан якладылар.
Э.Кожаева.