Уьстимиздеги йылдынъ увыт айынынъ 21-нши куьнинде Ана тиллер куьни белгиленди. Дагестан Республикасынынъ, сол санда Ногай районымыздынъ да билимлендируьв
учреждениелеринде, китапханаларында сол куьнге багысланган аьлемет кызыклы шаралар озгарылдылар.
«Шоьл тавысы» республикалык газетасынынъ негизинде ис коллектив пен, ДР Язувшылар союзынынъ ногай секциясы биргелесип, «Яша, тувган тилим» деген ятлав окув
конкурсын уйгынлы оьткерди. Бу куьн мунда Ногай район мектеблерининъ окувшылары оьз оьнерлерин коьрсеттилер.
Шынтысы ман буьгуьн мунда поэзияды суьйген окувшылар йыйылган эдилер деп айтпага болады. Конкурс оьзи де аьлемет байрамга айланды, соны соьз шатлыгы деп те атамага ярайды. Конкурста катнаскан окувшылар – бас баьтирлер эм ногай халкымнынъ асабалыгы. Эмилия Шураева, Омирзак Муталлапов, Ясмина Эдильбаева, София Суюндикова, Амина Акболатова и Айганат Байгараева — терен юрек сезимлери мен Гамзат Аджигельдиевтинъ, Кадриядынъ, Мурат Авезовтынъ поэтикалык асарларын яттан окыдылар. Аьр бир баладынъ окувы аьлемет эди, ама аьр кайсы конкурста да енъуьвши болады.
Конкурс енъуьвшиси Амина Акболатова болды. Ол – А-Х. Джанибеков атындагы орта мектебтинъ 10-ншы класс окувшысы. Мурат Авезовтынъ «Тилек» деген ятлавын терен
сезимлер мен окувы ман тоьрешилердинъ сейирин калдырды.
Экинши эм уьшинши савгалы орынларга – А. Асанов атындагы орта мектебининъ окувшысы Ясмина Эдильбаева, ол Гамзат Аджигельдиевтинъ «Ер» поэмасыннан уьзикти окыды, Кадрия атындагы мектебининъ окувшысы Эмилия Шураева Кадрия Темирбулатовадынъ «Суьемен» деген ятлавын окыды, тийисли болдылар.
Баьри конкурс катнасувшылары да савгалар ман, Сый грамоталар эм таьтли азыклар ман савгаландылар. Бу куьнги шара тагы да бир кере – Яслар арасында миллет тилге, маданиятка кызыксынув оьлшеми уьйкен экенин коьрсетти. Солай болганда, яшар Ногай тилим эм миллет кимик Халкым.
Г.Сагиндикова.
Суьвретте: газетамыздынъ боьлик редакторы М-А.Ханов савга тапшырады