Тувган тил аьр кайсымызга баалы. Ана тилде биз оьзимиздинъ энъ биринши соьзлеримизди айтамыз. Тил аьдем оьзин, оьзининъ тарихин, маданиятын сыйлатып уьйрететаган амал. Тил заманларды, несиллерди байланыстырады, тили бар халк яшайды, онынъ келеектегиси де тилин саклавга бойсынады.
Йыл сайын Халклар ара тувган тилининъ куьнине багысланып, район орталык китапханасында тотальный диктант язылув ийги аьдетке кирди. Туьрли яслы, туьрли кеспилер иелери бу куьн мунда йыйналып, тувган тил бойынша оьз билимлерин тергев ниетте, ана тилде диктант язувда катнасадылар. Олардынъ сырасында бир-эки йыл тувыл, бесинши кере белгиленген шарада ортакшылаганлары да бар.
Шарады библиограф Гульмира Улубиева ашты. Ол бу йыл диктант язувга ногай шаири Мурат Авезовтынъ «Художник эм кызалак» деген Сраждин Батыровка багысланган хабарыннан уьзик алынганын билдирди. Сол да босына тувыл, уьстимиздеги йыл шаир Мурат Авезовка –75 йыл толаяк, суьвретши Сраждин Батыров тувганлы 75 йыл болады. Диктантты А.Асанов атындагы Нариман авыл мектебининъ ана тил эм адабиат окытувшысы Альфия Янбаева окыды. Ол йыйылганларды байрам ман кутлап, тилди сакламага шакырды.
Солай болып бу куьн шара катнасувшылары Зейдулла Аджибайрамов, Асият Кельдасова, Гульнара Беккишиева оьз ойлары ман боьлистилер. Зейдулла Курман увылы аьр бир аьелде, аьр бир уьйде ата-аналар балалар ман ногай тилинде соьйлесе, олар балаларды кишкей заманыннан алып тилин баалап билип уьйретсе, тил сакланаягы акында айтты. Район орталык китапхана куллыкшылары диктант язувда катнасканларга эм олардынъ ислерин тергеген окытувшылар Мархаба Мансурова эм Альфия Янбаевага оьз разылыгын билдиредилер.
Н.Кожаева.