Оьспирлерге спорт айлак пайдалы. Ол ден савлыкты берклендиреди, акылды ислетеди, балалардынъ билимге ымтылысын оьрлендиреди. Оькинишке, аьлиги заманда оьспирлер коьбисинше компьютердеги ойынлар ман аьвлигедилер. Болса да, спорт пан каьр шегип, баьримизди де енъуьвлери мен сукландыратаган йигитлер де, Аллага шуькир, бар.
Озган йыл бизим газетамыздынъ бетинде яс спортсмен Абдулвахит Азимовтынъ акында макала шыкты. Онынъ енъуьвлери акында мен язган эдим, буьгуьнлерде Абдулвахит аьли де туьрли турнирлерде катнасып, енъуьвши болганын эситип, бек суьйиндим.
Спортсменнинъ тренери Азамат Кокоев ТереклиМектеб авылындагы № 2 номерли балалар-оьспир спорт школасында тренерпреподаватель болып ислейди. Балаларды эркин
куьрес кебине 2014-нши йылдан алып уьйретеди.
Абдулвахит Азимов тренерге 2019-ншы йыл келген. Аьлиги заманда ол Джанибеков атындагы мектебининъ 7-нши классынынъ окувшысы болады. Спорт ман кызыксынган оьспир окувында да уьстинликлерге етиседи. Алдына мырат салган инсан етимислер казанады.
Былтыр карагыс айында Абдулвахит Азимов Каспийск каласында эркин курес бойынша (16 яска дейим) турнирде катнасып, биринши орынды алды.
Быйыл сол калада Россия чемпионатында ортакшылык этип, уьшинши орынды алды. Абдулвахит алты куьресте катнасып, бесевинде енъуьвши болган. Кашан да, йигитимиздинъ яшавында аьли де коьп турнирлер, ярыслар болар, енъуьвлер де алар Абдулвахит. Соны баьримиз де яс спортсменге йораймыз, ашык йоллар сагынамыз.
Г.Бекмуратова.
Суьвретте: А.Азимов енъуьвшилер сырасында.