Аьдемликтинъ куватлы кесеги – Эр киси. Ога дайым сол сапатты тутпага ярдамшы – Хатын-кызлар. Бу аьдем орнында Ана, аьптелери, карындаслары, хатыны, кызлары болмага болады. Хатын-кызларды биз эр кисилер мен булай бир сырага салмаймыз, динимиз бойынша да хатынлар бир абытка артта юредилер. Ама хатын дегеннинъ орыны эр кисидинъ яшавында бек уьйкен.

Анадан басланады яшав, хатын ман барады сол яшав, кызлар болса, онынъ аявлысы эм баалысы болады. Хатын деген соьз эситсек, янъы ян, шешекейли тоьгерек як, ян авырув деген ойлар келедилер. Ушыны да бар…
Сога коьре де болар йылдынъ язлык шагынынъ басланган куьнлерининъ бирисинде календарь бойынша элимизде Хатынкызлар куьни белгиленеди. Оьзек те, бу куьнлерде дуныя юзине бек авыр заманлар – СВО, туьрли ерлерде урыслар, согысувлар… Ама табиаттынъ янланувын, тоьгерек яктынъ ярасыкланувын бир инсан да токтатып болмайды. Янъы йыл шагы – язлык келип туры, сол бизим коьнъилимизге шатлык эндирмейди деп айтып болмаймыз. Туьрли туьсли боьригоьзлер коьзимизди де кувантады. Бу куьнлерде коьплеген эр кисилер оьзлерининъ янларына аявлы аьдемлерине гуьл байламларын оьзлери савкатлап болмайдылар, неге десе олар Элдинъ япсарларын явдан саклайдылар, сенемиз, сол баьриннен де уьйкен сезим.
Келер тынышлы яшав элимизге, уллы енъуьв мен уьйлерине йигитлеримиз кайтар. Меним аьлиги соьзим согыс спецоперациясынынъ катнасувшысы Аскербий Иматали увылы Османовтынъ ярасык кызы Ваидадынъ акында.
Ваида бек оьктемсийди атасы ман:
– Меним атам Аскербий асылы ман – Нефтекум районынынъ Махмуд-Мектеб авылыннан. Ол 2015-нши йылдан алып контрактлы ис аьрекетти бардырады. Россия Украина ман согыс спецоперациясын баслаган куьнлерден алып, ол элди коршалавда турады. Баслапкы куьнлерде Херсонский йорыкта, сонъ Запорожский областин явдан босатувда катнаскан. Кайсы ерде болса да, мен атама тек савлыкты тилеймен эм дайым да ол меним юрегимде турады, – дейди А-Х.Джанибеков атындагы мектебининъ 9-ншы класс окувшысы. Ваида оьзи, окытувшыларынынъ билдируьвине коьре, бек билимли эм талаплы кыз.
Ол мектеб яшавында да белсен катнасады.
Ваида Аскербий кызы тек окув сабакларында терен билимге аваслыгын коьрсетип калмай, спорт, биюв, суьврет ясав ман да аьвлигеди. Саният бойынша да етимислери аз тувыл.
Ваидадынъ мырады архитектор болув. Онынъ элимиздинъ бас каласы Москвадагы архитектуралык йогары окув ошагына окымага туьспеге ниети бар. Биз онынъ мырады яшавга шыгаягына шекленмеймиз.
Алдыда – Халклар ара хатын-кызлар куьни. Сол байрам бизим кызларга куванышлы, шат коьнъилли болсын. Келеекте яшав Ваидадай яс несилге тынышлы эм таза аспан астында оьтсин. Согыс спецоперациясында ортакшылык этип юрген аьскершилеримиз тек кызларын тувыл, увылларын да кушакларына алып, суьйинген куьнлер мол болсынлар. Хайырлы болсын хатын-кызлар куьни!
Г.Курганова.
Суьвретте: В.Османова атасы ман.