Хатын-кызлар байрамы яркырап келеди аьр бир уьйге. Оны язлыктынъ, ярасыклыктынъ куьни деп босына айтпаймыз. Кыстынъ аязлы куьнлериннен сонъ табиат кайтадан коьркленип, куьш алады, биринши шаьбден ийгиликтинъ, янъылыктынъ белгиси болып, савлай
дуныяды сукландырады. Сол куьн биз де янымызга якын хатын-кызларды, аналарымызды, кызларымызды, аьптей-синълилеримизди байрам ман кутлаймыз.

Буьгуьн мен язлыктынъ байрамы ман шынты йигитлер оьстирген аналардынъ бириси – Курасхан Саид кызы Байрамовады кутламага суьемен.
Коьплеген йыллар артта ол Кизляр районынынъ Новокрестьяновское авылыннан меним тувган авылым Уьйсалганга келин болып, Байрамовлардынъ аьелине туьскен.
Оьз авылында мектебти битирип, ол туькенши кесписин байырлайды. Сол яслык йылларында бакты ога Алимеджан ман йолыкпага, аьел курмага буйырады.
Яс аьел Воронежская областининъ Павловский районынынъ Гаврильск авылына коьшеди. Мунда ерлесип, уьйли, бала-шагалы боладылар. Ызлы-ызыннан аьелде уьш увыл тувадылар – Рустам, Шамиль эм Арифулла. Балалардынъ куьлкисине толды Байрамовлардынъ уьйи. Кеделердинъ ланъкасы да куьшли
болады. Болса да, Алимеджан Толевхан увылы эм Курасхан Саид кызы аьвлетлерин татым болынъыз, бир-биринъизди коршаланъыз деп уьйрететаган
эдилер. Сога коьре, тоьбелесип турган кеделер аьли ок ярасып, кайтадан завыкланып ойнайтаган эдилер. Курасхан Байрамова туькенши болып ислейтаган
эди, куллыктан сонъ аьелине, саьбийлерине карайтаган эди.
Уьйде тазалык, аьзир ас болатаган эди аьр дайым. Увыллары ата-анасына аьр дайым коьмекши эди бала заманнан алып, уьйшиликте де бир куллыктан да кажынмайтаган эдилер. Аналары оларды эркин йибермейтаган эди, уьш эр балады оьстируьв тынышлардан тувыл. Атасы Алимеджан Толевхан увылы кеделерди эркли, йигерли болынъыз деп уьйреткен. Соьйтип, ата-анадынъ куьези – увыллар яшавда яваплы, шынты эр кисилер болып оьстилер.
Увыллар мектебти битирип, колына кеспи шайытлама алдылар, эр борышын да толтырдылар. Аьр бириси аьел курдылар, оьз аьвлетлерин оьстиредилер. Рустам ман Шамиль Ямало-Ненецкий автономный округта ислейдилер.
Алимеджан эм Курасхан Байрамовлардынъ кишкей увылы Арифулла оьз яшавын Аталыкты саклав исине багыслады. Арифулла Байрамов СВО еринде йигитлерше согысып, явга карсы турып, яс янын берген ясларымыздынъ бириси болады.
Курасхан Саид кызы – куьшли хатын, онынъ яраланган юрегинде увылы Арифулла акында эс саклап, оьз бактысына, Кудайына разы болып яшавын бардырады.
– Бизим анамыз – акыллы эм куьшли инсан. Ол, язлыкта шыккан куьндей болып, баьримизге де йылувлык береди. Уьш увылын да ол соьйтип саклаган, аьвлетлерининъ янларына ийгиликтинъ нурларын севип. Аьлиги заманда ол уныкларын да аьдиллик пен яшамага, намыслы, куллыксуьер болмага уьйретеди. Баьрисин де аявлап, кызганмай оьз суьйимин, заманын, йылувлыгын береди, – деп хабарлайды кайынанасы акында Арифулладынъ хатыны Ксения Байрамова.
Буьгуьнлерде Курасхан Саид кызы ян йолдасы ман Гаврильск авылында яшайды, атай ман тетейде ети уныклар бар.
Увыллары ман аьр заманда да оьктемсийди Курасхан Байрамова. Олар – хатыннынъ янынынъ кесеги. Увыллары да оны коршалайдылар, аявлайдылар. Арифулла да йогарыдан, ак маьлек болып, анасын баьри баьле-казадан саклайды.
Мен шынты баьтирди оьстирген анадынъ алдында басымды иемен, разылыгымды билдирип, язлыктынъ байрамында баьри ийгиликлерди сагынаман. Яраланган ана юрекке саьбийлеринъиздинъ, уныкларынъыздынъ куьлкиси, язлыктынъ йылы нурлары эм болсын деп айтаман. Сондай баьтирди
оьстирген хатыннынъ куьшли касиетлери бу яшавдынъ куьезин коьрмеге амал береегине шекленмеймен.
Г.Бекмуратова.
Суьвретте: Байрамовлардынъ аьели.