Маданият пан бактыларын байланыстырган аьдемлердинъ ишки дуныясы ярасык болады деп ойлайман. Тек ишки дуныясы тувыл, олар оьзлери де ярасык. Соьйтип ойлайсынъ, Коясыл авылынынъ социаллык-маданият биригуьвининъ етекшиси Тереза Дукувах кызы Аджиевады коьргенде. Онынъ йогары кеспилигининъ аркасы ман маданият учреждениеси, ызгы йыллардынъ коьрсетуьвлерине коьре, Ставрополь крайынынъ ийги деген уьш учреждениесининъ бириси болады. «Халк» деген сыйлы атты «Россиянка» хоры, «Шатлык» эм «Алтынай» биюв ансамбльлери, «Абрис» мода театры алдылар.
Сол етимислерге оьз уьлисин маданият биригуьвининъ етекшиси коскан. Тереза Аджиева – куллыксуьер эм талаплы инсан, онынъ иси маданият учреждениесининъ специалистлерине ийги амаллар туьзуьвге каратылган. Маданият коллективлер туьрли конкурсларда, фестивальлерде катнасып, баргылы орынларга тийисли боладылар. Айырым маьне Тереза Дукувах кызы миллет маданият асабалыгын саклавга эм оьрлендируьвге, халклар ара дослыкты эм макулласувды беркитуьвге каратылган шараларга береди. Ол оьзи баска куллыкшыларга коьрим эм насихатшы болады. Коьплеген проектлердинъ авторы Тереза Аджиева Нефтекум районында яшайтаган халклардынъ аьдетлерин, тиллерин, маданиятын саклав ниет пен исин бардырады.
Тереза оьзи – яратувшылык инсан, ол ятлавлар, макалалар, сценарийлер, йырлар, хабарлар язады. Биринши ятлав йыйынтыгын кыскаяклы 2024-нши йылда баспалаган. Мунда онынъ суьйим, Аталык, аьел, согыс акында язылган шыгармалары киргенлер. Коьплеген ятлавлары согыс спецоперациясына багысланган. Тереза Дукувах кызынынъ макалалары «Народная культура Ставрополья» деген журналда баспаланган, йырлары маданият коллективлери мен
йырланып турады.
Тереза Аджиевадынъ етекшилеви астында Коясыл авылында байрамлар, шаралар озгарылады: «Навруз Байрам», «Сабантой», эстеликли куьнлерге багысланган концерт программалары эм баскалар. Тек Коясыл авылында тувыл, баска авыл маданият куллыкшыларына да коьмек этеди ол, коьплеген концертлерге сценарийлер аьзирлеген, «Маскара» халк театр коллективине онавдан артык пьесалар язган.
Тереза Аджиева етекшилейтаган учреждение край бойынша озгарылатаган шараларда катнасады, Ставрополь крайынынъ Ногай региональли-маданият автономиясы ман тар байланыс тутады. Йылдан-йылга маданият учреждениесинде материаллык яктан да аьллер ийгиленеди, керекли техника, костюмлер алынган. Соны ман бирге маданият коллективлердинъ етимислери де оьседи. 2017-нши эм 2023-нши йылларда «Энъ де ийги мадани ят уьйи» деген атка тийисли болган, куллыкшылар акшалы баргылар аладылар йыл сайын. 2024-нши йыл художестволык етекши Ставрополь крайынынъ губернаторынынъ маданият эм саният аьрекетшилерине берилетаган стипендиясын алган.
Тереза Аджиева осал яшайтаган аьеллерге уьйкен маьне береди. Уьш йылдынъ ишинде коьплеген саваплык шаралар озгарылган, солардынъ ишинде –
сакат балалардынъ уьйлерине барув. Йыл сайын Янъы йыл алдында Тереза Дукувах кызы балалар уьйине етим балаларга савкатлар оьзи элтейди. 2023-нши йыл маданият учреждениесинде согыс спецоперация катнасувшыларга коьмек этуьв волонтерлар куьби ашылган. Тереза оьз куллыкшылары ман сол куьптинъ исинде белсен катнасады, олар ай сайын СВО ерине авыл яшавшылары ман йыйналган гуманитарлык юклер йибередилер.
Тереза Дукувах кызы Аджиева ийги иси уьшин Ставрополь крайынынъ маданият министерствосыннан, Нефтекум районынынъ администрациясыннан, маданият боьлигиннен Сый грамоталар ман, Ставрополь крайынынъ Губернаторыннан Разылык хат пан, «За патриотическое воспитание молодежи» омырав белги мен савгаланган.
Талаплы хатын «Ставрополь крайынынъ сыйлы куллыкшысы» деген атты кайратлы иси мен казанган. Аьр заман этип турган коьмеги уьшин Тереза Дукувах кызына Степновский ясы етпегенлер уьшин социаллыкреабилитационлык орталыгы ман Разылык хат тапшырылган. Янъыларда Тереза Аджиевадынъ баславы эм куллык этуьви мен Коясыл авылында «Тувган тил – халктынъ яны» деп аталган ногай тилининъ клубы ашылды. Бу уьйкен эм маьнели оьзгерис. Балалар ногай тилинде соьйлесе, келеектегимиз уьшин парахат болармыз.
Тереза Дукувах кызы Аджиева – оьз исине алал хатын. Сол алаллык, оьз исине суьйим, яратувшылык ога баьри кыйынлыкларды оьтпеге, исин йогары дережеде юритпеге амал береди. Язлык байрамы ман кыскаяклыды эм Коясыл авылынынъ маданият учреждениесининъ хатынкызларын исси кутлаймыз.
Баьри мыратлары, ойлары яшавга шыгарылсын деп йорав этемиз.
Г.Бекмуратова.
Суьвретте: Т.Аджиева.
