Янъыларда Ногай район администрациясында болып озган коллегия йыйынында сонынъ катнасувшылары уьш маьнели соравларды ойластылар.
Шарада Ногай район администрациясынынъ аькимбасы Джамалутдин Эсиргепов, онынъ эки де орынбасарлары Рашид Шангереев, Мурад Шадиев, авыл аькимбаслары, ыхтыяр саклавшы органларынынъ етекшилери ортакшылык эттилер.
Коллегияда «Электроэнергиядагы йойымларды тоьменлетуьв эм энергияды кытып кулланув бойынша шаралар акында» деген биринши сорав бойынша Ногай район электротармаклар управлениесининъ эксплуатация бойынша бас инженери Мурза Мавлимбердиев шыгып соьйледи.
Онынъ айтувы ман, райондагы ТереклиМектеб, Нариман, Кумлы, Червленные Буруны, Шумлелик, Бораншы, Уьй-Салган авылларындагы бир неше орамларда эскирген электротеллери янъы СИП-2 теллерине, хыйлы эски курыклар, КТП-лар янъыларына авыстырылган, соны ман бирге бир неше трансформаторлар ярастырылган. М.Мавлимбердиев быйыл да Ногай РЭС коллективи этеек куллыклар акында хабарлады.
Йыйында «Кулланувшылар ягыннан энергоресурсларды эсаплап кулланув уьшин ягарлыкэнергетикалык комплексининъ тармагында ыхтыяр бузувларды иркуьв бойынша куллыкты уйгынлав акында» деген сорав ман байланыста Ногай районы бойынша Россия МВД боьлигининъ полиция уполномоченныйы эм ясы етпегенлер ислери бойынша инспекторлар боьликтинъ етекшиси Крымхан Кусепов доклад этти.
– Ногай районы ТЭК бойынша 72,8 миллион маьнет акша тоьлевге борышлы. Сонынъ ишинде: газ яктан – 67,7 миллион маьнет, электроярыгы яктан – 5,2 миллион маьнет акша, – деп билдирди К.Кусепов.
Коллегиядынъ «Ногай муниципаллык районынынъ санитарлык аьллерин ийгилендируьв бойынша коьрилетаган шаралар акында» деген 3-нши соравы акында район администрациясынынъ архитектура эм ЖКХ боьлигининъ специалисти Куьлсим Умарова хабарлады. Баьри соравлар ойласылган сонъ Д.Эсиргепов аьр бир сорав бойынша тийисли токтаслардынъ проектлерин окыды.
М.Юнусов.