Ногай районынынъ Шумлелик авыл орта мектебинде янъыларда шатлыклы аьлде Россия халкларынынъ бирлик йылы ашылды.
Бу аьвелги ногай авыл еринде аьлиги заманларда 1969-ншы йылдынъ язлыгында Дахадаев районынынъ Дзилебки авылыннан коьшкен даргин миллеттинъ
ваькиллери яшайдылар. Авылдагы мектебте коьп йыллардан бери татымлыкта эм дослыкта ерли даргин эм районнынъ баска авылларыннан ногай миллетли
хатын-кызлар бирге куллык этедилер. Сол себептен Россия халкларынынъ бирлик йылына багысланган шарады оьткеруьвди баьриси де ак юректен хош коьрдилер.
Соны ман бирге ызгы йылларда бу авылдан эм районымыздынъ баска авылларыннан коьп яс аьдемлер элимиздинъ туьрли регионларына кетип окыйдылар, ислейдилер эм яшайдылар. Солай ок Шумлеликтен де бир хыйлы яслар буьгуьнлерде согыс спецоперациясы юритилип турган ерлерде Тувган Элимиздинъ эркинлигин йигитлерше коршалайдылар.
Шарады ашаятып, мектебтинъ директоры Омаргаджи Шахбанов аьлиги енъил болмаган халклар ара аьллерди эслеп, уьстимиздеги йылды Россия Президенти Владимир Путин элимиздинъ халкларынынъ бирлик йылы деп билдиргенин белгиледи. Онынъ соьзи мен, патшалыгымыздынъ етекшисининъ сондай карары заманга келисли карар, неге десе тыпак элди эм бир ниетли халкты бирев де бузып болмайды.
– Бизим уллы Россия Аталыгымызда 200-ге ювык миллетлер эм халклар яшайдылар, олар баьриси де Россия Конституциясына коьре тенъ ыхтыярлар ман пайдаланадылар. Биз коьпмиллетли эм коьпдинли патшалык боламыз.
Россия эсабына солай ок бизим Дагестан Республикасы да киреди. Дагестан – ол бизим патшалыгымызда энъ де коьпмиллетли республика, мунда оьмирлер
узагы тынышлыкта эм татымлыкта 40 миллетлер мен халклар яшайдылар. Бизде бир заманда да аьдемлерди миллетлери эм динлери уьшин айырмаганлар, Дагестан дуныяда бир регионга да усамайтаган аьлемет татым субъект деп белгили. Республикамызда дайым да бу яктан тынышлык, парахатлык, эмишлик тутылады.
Бизим Ногай районында да яшавшылардынъ коьбиси ногайлар, экинши орында сан яктан биз – даргинлер боламыз, сол ок заманда аз санлы болса да, орыслар, республикамыздынъ баска миллетлери де яшайдылар. Биз де районымызда оьзимиз ара татымлыкты эм дослыкты берк тутамыз. Кайсы заманларда да биз Россиядынъ каеринде яшасак та, халклар ара бирлик бизим уллы патшалыгымыздынъ оьмирлер бойында турган бас негизи болып
келген эм келеди. Сонынъ акында бизим акыллы эм каьмбил ата-бабаларымыз дайым да айткан эм бизим бирлигимиз бизге карсы шапкынлык эткен баьри де явларды да япырган, неге десе тыпак элди эш бирев де бир заманда да енъип болмайды, – деди Омаргаджи Шахбанов.
Байрам шарасында мектеб окувшылары Россиядынъ бир неше халкларынынъ: орыс, ногай, Сырт яктагы эвенклердинъ, долганлардынъ, чукчалардынъ, бурятлардынъ, Кавказдагы аварлардынъ, шешенлердинъ, адыглардынъ миллет кийимлери, йырлары, биювлери мен асларын коьрсеттилер.
М-А.Ханов.
Суьвретте: шарадынъ катнасувшылары.