Хатын-кызлар куьни алдында Ногай районынынъ халк яратувшылык орталыгында ярасыклы болып кийинген аьдемлер коьп эди. Язлык байрамы уьйде онъайлык туьзетаганларды, аьдетлерди саклайтаганларды, савлай дуныяга яшав беретаганларды – хатынларды йыйнады. Кашан да, концерт
программасынынъ сыйлы каравшылары согыс спецоперациясынынъ катнасувшыларынынъ аналары, хатынлары эди. Солардынъ арасында элимиз
уьшин ян берген баьтирлеримиздинъ тул хатынлары да бар.
Шатлыклы кешликти юритуьвшилер Артур Межитов эм Медина Елманбетова аштылар. Олардынъ сахнада оьзлерин юритуьви, айткан соьзлери шарады йылувлы эм анага, хатынкызларга, исшилерге сыйлы эттилер. Биринши болып соьзди муниципалитеттинъ аькимбасы Джамалутдин Эсиргепов алды. Ол залда олтырган кыскаяклыларга кайратлы иси, шыдамлыгы, акыллылыгы уьшин разылык соьзлерин каратты. Район басшысы айырым Аталыкты коршалавшыларды оьстирген эм тербиялаган аналарга коьтергишлев соьзлерин айтты. Юреклерге тийди Ногай районынынъ Хатынкызлар советининъ председатели, ДР Ямагат палатасынынъ агзасы Асият Бадий кызы Манкаевадынъ шыгып соьйлеви. Ол ашык кепте кыйынлы заманларда да йылувлык беретаган анадынъ уллы суьйимининъ эм несиллердинъ уьзилмес байланысын белгиледи.
Асият Манкаева баьри хатын-кызларды язлык байрамы ман кутлап, тынышлык, ийгилик эм онъайлык йорады. Концерт программасы шынтылай да юлдызлы болды. Зал, сахнага данъклы артистлер, йырлавшылар шыккан сайын, токтамай карс кагып турды. Ат казанган артистлер эм яс оьнерлер бирбирисин авыстырып турдылар сахнада.
Эрболат Ваисов «Савкатланъыз хатынларга гуьллерди» деген йыры ман баьрисин де сукландырды. Бу композиция кешликтинъ гимни болды деп айтпага
да болады. Биюв коллективлери де шарады оьнери мен коьтердилер. Альмира Тунгатарова етекшилеви астында «Карлыгаш» ансамбли каравшыларга суьйиниш савкатлады. Олардынъ колларынынъ аьр бир силтеви сахнага суьйимине толы эди. Яс артистлер де уьйкенлерден калмадылар. Кайтип ярасык этип «Айланай» ансамблиндеги «Ай-айданак» биюв куьби шыгып, оьнерин коьрсеттилер. Кишкей юлдызлар залды есирге алдылар биюви мен.
Каравшылардынъ коьнъилин «Юлдызлар» ансамбли де коьтердилер. Йырлавшылардынъ кайбириси занъыраган сеслери мен концертти ярасыклы эттилер. Мурзабек Итупов, Гульназ Теркеева, Мурат Ваисов, Алтынай Ярикбаева эм Каирбек Кокенеев хатын-кызларга ийги деген йырларын эситтирдилер.
Кешликтинъ айырым катнасувшысы талаплы кобызшы Расиль Акбулатов эди. Онынъ кобызда оьнерли ойнавы каравшыларды суьйикли анъларды
эске алмага амал берди. Мага коьре, саз алаты талаплы коллардынъ астында зал ман суьйимнинъ эм язлыктынъ тилинде соьйлегендей болды.
Шатлыклы концерт районымыздынъ хатын-кызларына ярасыклы эм шынты савкат болды. Мунда мунъшылык эм суьйиниш, баьтирлеримиз уьшин оьктемлик эм тынышлы келеектегимизге сеним байланыстылар. Баьри заттан да маьнели, каравшы кыскаяклылар оьзлерин керекли эм суьйдимли деп сездилер, олардынъ йигитлиги (аналык, куллыкшы, инсанлык) билинмей калмаганын анъладылар. Сол тувыл ма шынты наьсип аьр бир хатынкызларга.
Г.Сагиндикова.
Суьвретте: шарадан коьринис.