Халклар ара Хатынкызлар куьни алдында Терекли-Мектебтеги ТахоГоди атындагы уьлке-танув музейининъ филиалында аналардынъ баьтирлигине,
суьйимине эм эрклигине багысланып, ярасыклы шара озды. «Сизге, суьйгенлер» деп аталган йолыгыс (суьвретте) юреклери кайгыга толы, согыс спецоперациясында увылларын йойыткан аналарга каратылды.
Шатлыклы шарага яс янларын аямай, СВО еринде баьтирлерше согыскан йигитлеримиздинъ аналары шакырылды: Авархан Шамсудинова, Барият Курбанова, Кошимхан Аблезова, солай ок буьгуьнлерде яс несилди тербиялайтаган хатын-кызлар: коьпбалалы аналар Фатима Суюндикова, Земфира Абдулбариева (СВО катнасувшысынынъ хатыны), окытувшылык исининъ ветераны, Джанибеков атындагы мектебте бир неше несилдинъ балаларын окыткан Сайдат Максутова, ЗАГС етекшиси Тамара Суюндикова. Айырым эс, увыллары оьз согыс борышын толысынша толтырып, Йигитлик орденине
(оьлгеннен сонъ) тийисли болган аналарга берилди.
Шарада уьйкен несилдинъ эм яслардынъ бирлиги аян сезилди. Оьз оьнерлери мен йыйылганларды А-Х.Джанибеков атындагы мектебтинъ окувшылары
сукландырдылар. Яс артистлер тынышлык, ийгилик, аналар акында йырладылар, уьйкен класслардынъ балалары юрекке тийип, коьзяслар шыгарган ятлавларды яттан окыдылар. «Юлдузлар» биюв куьби тагы да бир кере каравшылардынъ коьнъилин коьтерди. Рабият Алавдин кызынынъ етекшилеви астында яс юлдузлар ярасыклы биюв бийидилер.
Ногай районынынъ Хатын-кызлар советининъ председатели, Дагестан Республикасынынъ Ямагат палатасынынъ агзасы Асият Манкаева оьз соьйлевинде шарада катнасып турган хатынларга кутлав эм разылык соьзлерин айтты. Ол аьр бир аьскершидинъ баьтирлиги артында анадынъ уллы суьйими туратаганын белгиледи. Асият Бадий кызы йыйылганларга залда олтырган аналардынъ увыллары акында хабарлады эм олардынъ атлары республикамыздынъ эм районымыздынъ тарихинде алтын арыплар ман дайымларга язылганын айтты. Кутлав соьзи мен Терекли-Мектеб авылынынъ аькимбасы Марат Кулунчаков шыгып соьйледи. Эр кисилер атыннан ол хатынлардынъ алдында шыдамлыгы эм каьмбиллиги уьшин басын ийди.
Баьри хатын-кызларга байрамнынъ белгиси – язлык шешекейлер тапшырдылар. Сол куьн кыскаяклылар тек байрам ман кутлавлар алув тувыл, йылувлыкка эм суьйимге оралдылар. Музейде оьткен шара бизим эсимизге тагы да бир кере эр кисилерге аьр заманда да баьри баргылардан баалы хатын-кызлардынъ –
аналардынъ, аьлейлердинъ, кызлардынъ суьйими эм коьтергишлеви экенин салды.
Г.Сагиндикова.