Сыйлы Рамадан айда аьскершилеримизге согыс спецоперация юрген ерде оразады тийисли кепте тутар уьшин, оларды баьри керексинетаган затлар ман да канагатлав, коьтергишлев бек маьнели. Янъыларда Ногай районынынъ Куьнбатар авылыннан волонтерлар эм белсенли аьрекетшилер, айтпага, Адил Махмудов, Набибулла Байрашев, СВО катнасувшысы Ринат Индирбаев, Батыр-Мурза авылыннан Крымхан Ялманбетов сырасын туьзген делегация 3,5 тонна гуманитарлык югин согыс спецоперация ерине етимисли еткерди. Адил Махмудов бу онъайлы ис пен уьшинши кере барды, бу йол ол гуманитарлык югин еткеруьвге деп оьзининъ «Газель» коьлигин де берди. Навруз айынынъ биринши куьнлеринде Запорожье эм Донецк еринде кызмет этетаган Ногай
районынынъ аьскершилерине эм олардынъ касындагы йолдасларына ети койдынъ эти, сув, емислер, ясылшалар, азык-туьлик, окоп майшыраклары, гигиена амаллары, газ баллонлары, керекли дарманлар, йылы ювырканлар, кийимлер, 37 шилтерлери, исси аслары эм таьтли зияпетлери йиберилдилер. Баска болып, йыйылган акша амалына волонтерлар ман аьскершилерге алдына салынган борышларын толтырув уьшин бек керекли камерасы ман квадрокоптер де алынды. Квадрокоптер эм гуманитарлык юги районнынъ яны авырыган яшавшыларынынъ куьши мен йыйылган акша амалына алынды. Маьнели уьлисин Ногай район администрациясы – 100 мынъ маьнет, район орталык больницасынынъ ис коллективи – 33 мынъ 550, «Ногай эл» балалар бавынынъ
куллыкшылары – 67 мынъ 150, Червленные Буруны авыл администрациясы – 12 мынъ 500, эмир Эдиге атындагы межигитинде бир куьнлик юма йыйылысы – 12 мынъ167, Орта-Тоьбе авыл яшавшылары –10 мынъ, Кумлы авыл яшавшылары – 10 мынъ маьнет, Сары-Су авыл яшавшысы Насиплиабай оьзининъ бирге окыган йолдаслары атыннан 10 мынъ эм сондай коьплеген яны авырыган яшавшылар оьз уьлисин костылар. Баска болып, биринши орында керекли
затларын эм акша амалын йыювда уьйкен белсенлик пен мектеблер, балалар бавлары, Терекли-Мектеб, Кумлы, Карасу, Калинин, Батыр-Мурза, Червленные Буруны, Бораншы, Куьнбатар, Нариман, Орта-Тоьбе, Уьйсалган авыллар яшавшылары белсенли катнастылар. Солай болып, бу саваплык исине «Шоьл тавысы» республикалык газетасынынъ куллыкшылары да шетте карап калмай, оьз косымын этти. Уьйсалган авылдынъ яшавшылары баска болып, исси асын, азык-туьлигин юк кетеек куьн еткердилер.
«Биз согыс спецоперация еринде аьскершилеримизди коьтергишлевимиз бек маьнели экени акында анълаймыз. Куьн сайын олар бизим тынышлыгымызды эм кавыфсызлыгымызды коршалап, оьз яшавларын аямай келедилер. Бизим борыш – оларга кыйын согыс куьнделигинде ийги аьллерин туьзуьв болады. Биз гуманитарлык югин йыювда белсенли катнасувлары эм баасыз уьлиси уьшин районымыздынъ баьри яны авырыйтаган яшавшыларына, муниципалитет, авыллар администрацияларына, баска болып, мектеблер, балалар бавлары ис коллективлерине уьйкен разылыгымызды билдиремиз. Алдышылыкка йиберилген бизим азык-туьликлеримиз йигитлеримизге уьй йылувлыгы акында эслерине туьсирип, оларды элинде, тувган еринде аман-эсен Енъуьв мен кайтканларын саклайтаганлары акында сенимин беркитсин. Сизинъ янларынъыз авырувы, авыр заманларда ердеслеримизди коьтергишлеп келетаганынъыз уьшин разылыгымызды билдиремиз, – деди «Неравнодушные сердца» волонтер куьбининъ етекшиси Зарема Толубаева. Белгилеп озайык, «Неравнодушные сердца» волонтер куьби район орталыгында 2025-нши йылдынъ увыт айынынъ 27-нши куьниннен оьз аьрекетин юритип келеди.
Онынъ сырасын Ногай районынынъ баьри авылларыннан да яшавшылар туьзедилер.
Айырым разылыкка волонтерлар: Крымхан эм Айбике Ялманбетовлар, Нурбийке Османова, Сапуэт Манапова (эки СВО катнасувшыларынынъ анасы), Коьшбике Нукаева, Зумруд Исаева, Зарина Темирбулатова, Маржанат Машакова, Феруза Аманкаева, Румия Акбулатова, Айбике Куванаева, Хаирниса Нурлубаева, Алимет Аблезова, Зульфия Кожаева, Зарема Толубаева эм сондай коьплеген баскалар туьзедилер. З.Толубаевадынъ етекшилиги астында бир
йыл бойынша волонтер куьби 35-тен артык гуманитарлык югин СВО ерине йиберген.
Баска болып, волонтерлардынъ эм туьрли организацияларынынъ куьши мен аьскершилерге 200 шилтерлери согылып йиберилген. Олардынъ енъуьвге косымы бир неше туьрли аьскер етекшилевлерининъ Разылык хатлары ман да белгиленген.
Алдышылыктан келетаган шынты разылык соьзлер де юреклерди оьктемликке толтырады эм сол коьтергишлевдинъ маьнелигин шайытлайды. Олар бизди, йогарымыздагы тынышлы коькти коршалайтаганлардынъ аьскершилик коьнъилин коьтередилер. Каты урыслар арасында, тыныклы такыйкалар ишинде аьскершилер балалар ман язылган хатларды, йылы йоравлар ман открыткаларды окыйдылар. Сол хатлар, мылтыгот кокыган окопларда куьн коьзиндей кирип, аьскершилеримиздинъ юреклерин сувык навруз айы куьнлеринде йылытадылар. Олар тез арада келеек Енъуьвге, тувган еринде кардаш- тувганлары ман аьсиретли йолыгыска сеним бередилер. Аьскершилер алдышылыктан окувшыларды йылы йоравлары эм баьри яны авырыганларды да ийгилиги, юрек юмартлыгы уьшин, баасыз ярдамлары уьшин кыска видеороликлер аркалы разылыкларын билдиредилер. Сол онъайлы исин уйгынлавдынъ тамамында,
коьрмей яныннан оьтип болмайтаган, дайым ярдамласпага, коьтергишлемеге аьзир болган юмарт аьдемлер мен дуныя ысланатаганын аян анълайсынъ.
Г.Нурдинова.
Суьвретте: гуманитарлык юги йиберилуьв мезгили.