«Согыс ер юзинде баьтирлердинъ санын оьстиреди», – деп язган уллы Расул Гамзатов. Бизим ердеслеримиз согыс спецоперациядынъ биринши куьнлериннен алып, алдышылыкта сол соьзлерди иси мен аклап келедилер. Бизге аьр бир СВО катнасувшысы эм боьтен де оьз янларын эли уьшин курман эткенлер – йигитлер. Ызгы заманларда коьп аналар «Сиз шынты Баьтирлерди тербиялагансыз. Сизге увылынъыз уьшин савбол айтып, алдынъызда басымызды тоьмен иемиз эм уьйкен разылыгымызды билдиремиз» деген соьзлерин эситедилер. Олардынъ эсинде сол соьзлер дайымга оьктемлик эм кайгырув ман байланыслы болып калаяклар. Бир яктан оьз борышын йигитлерше толтырган аьвлетлери уьшин – оьктемлик, баска болып, оларды йойытканына – каты кайгырув.
Кизляр районынынъ Нововладимирская орта мектебининъ выпускниги Рустам Бораевтинъ яшавы баскаша туьзилмеге де болаяк эди. Оьз замандасларындай болып, ол да тынышлы яшавы ман куьезленип, суьйикли иси мен каьрлеп, аьсиретли ойларын яшавга шыгарып, алдыга йигерли адымлап келмеге болаяк эди. Ама бакты оьзинше буйырды. Ол оьз элин коршаламага турганлардынь сырасында оьз яшавынынь баасы ман, коьптен сакланган енъуьвди
ювыклатувга оьз уьлисин косты.
Рустам Курман увылы Бораев 1992-нши йылдынъ кырк кийик айынынъ 30-ншы куьнинде Кизляр районынынъ Нововладимирское авылында тувган. Бала
шагыннан алып ол оьзин алал эм сенимли йолдас, мектебтинъ ямагат яшавында белсенли катнасып келген яваплылыгы ман, коьримли окувшы этип коьрсетти. Рустам касындагыга ийгилик этпеге суьйген, дайым да ярдамга аьзир болган, шалыскыр яс болып оьсти.
Ерли мектебте 38 йыллар бойы шет эллер тиллериннен окытувшы болып, бактысын яс несилди билимлендируьвге багыслап келген Рустамнынъ анасы Надежда Омурзак кызы Ярыкова увылына бала шактан алып аьдиллик, куллыксуьерлик, алал йолдас болув касиетлерин тербиялап келди.
Оьскенде ол анасына эм кардаштувганларына дирек эм сеним болды. 11-нши классты тамамлаган сонъ, Рустам коьп ойланмай, оьз тенълериндей болып, асыл мырадын яшавга шыгарды. Сургут каласындагы нефтяной техникумына туьсип, оны етимисли тамамлайды.
Кеспиди байырлап, яс аьскер борышын толтырмага йолланды. Аьскер службасын Рустам Екатеринбург каласынынъ мотострелковый бригадасында оьтти. Онда ол оьзин нызамлы, кайсы борышын да яваплы толтыратаган аьскерши этип коьрсетти.
Эр борышын уьстинликли толтырып кайткан яс, онъайлы яшавын туьзер ниетте, алыс Сургут каласына йол алады. Онда Рустам МЧС службасында аьрекетлеп, сулыбын оьстирип келди. Ама тезден ога тувган Дагестанга кайтып, Кизляр каласында куллык этпеге туьсти. 2022-нши йылдынъ куьзи Рустамнынъ яшавына уьйкен туьрленислерин аькелди. Аталыгымыз оьз коршалавшыларында керексингенде, ердесимиз тасада карап турып болмады. Яс Элининъ уьстиндеги тынышлы коькти коршаламага алдышылыкка атланганлардынъ сырасын туьзди. 2022- нши йылдынъ казан айынынъ 17-нши куьниннен алып ол согыс спецоперация юрген ерде катнасып келди. Эр борышын толтырганда алган аьскершилик сулыбы, Аталыгын коршалавга шыкканда, яска бек керекти. Ол СВО-да катнасканнан алып, Донецк, Запорожье, Харьков областьлерининъ ялынлы йоллары ман юрип, дав майданларында коьп сынавларын оьтти.
Рустам алдына салынган борышын яваплы толтырып келип, оьз согыс йолдасларынынъ яшавларын коьп кере оьлимнен куткарган заманлар да болган. Донецк областининъ Бахмут каласы туьбинде юрген каты урыслардынъ бирисинде ол явдынъ куьллесиннен каты яраланады. Астрахань областиндеги Ахтубинск госпиталинде коьп заман ятады, оннан сонъ, эмленуьвин бардырмага уьйине йибериледи. Ийгиге кайтканнан сонъ, 2023-нши йыл аьскерши оьз
согыс йолдаслары ман бир сырага турып, явды каты согып келди. 2025-нши йылдынъ караша айынынъ 20-ншы куьнинде сапер Рустам Бораев оьз йолдаслары ман кезекли борышын толтырып туратаган базага кайтып барув йосыгында, явдынъ дронынынъ токтавсыз атувына карсы келеди.
Дроннынъ аткан куьллелериннен алган каты ярадан йигитимиздинъ яс яшавы уьзилди. 34 ясында ол янын Аталыгы уьшин курман этти.
Соьйтип, йылтыраган кара коьзли эм ашык юзинде ярасык куьлкиси мен яс бизден дайымлыкка кешти. Бораевлердинъ аьелинде ол ялгыз увылы, олардынъ оьктеми эм диреги эди. Онынъ бирге кызмет эткен йолдаслары арасында сыйы-абырайы да, ога сеними де уьйкен эди. Рустам ман алдышылыкта болганлар онынъ йигитлигин, дайым да ярдамга аьзир болганын тек ийги соьз бен белгилейдилер. Яшавынынъ курман болганы акында келген сувык темирдей хабар, тек анасы Надежда Омурзак кызы тувыл, онынъ кардаштувганларынынъ, авылдасларынынъ да шаркын сувытты. Сол хабар олардынъ дуныясын экиге –
«ога дейим» эм «ян берген сонъ» дегенге боьлди. Рустам оьз аьелин, уьйин курып, ата болув деген суьйиништи де сезип уьлгирмеди. Сол мыратлары, ойлары кесек такыйкалар ишинде уьзилип, увыткыш оькинуьвди калдырдылар.
Анасы Надежда Омурзак кызына эм онынъ кардаш-тувганларына сол яра бир де битпеек. Анасына ялгыз увылынынъ яшавдан кешуьви, кардаштувганларына аданасын, досын йоюв – уьйкен сынав. Рустам Бораев кыска, ама ярык яшавын яшады. Онынъ оьткен йолы – яслай уьзилсе де, ол йигитликтинъ, коьримли кызмет кылувдынъ, шынты патриотизмнинъ ярык шайыты.
Баьтирди таныган, бирге касында кызмет эткен, ердесим деп оьктемсиген аьдемлердинъ юреклеринде дайымга калар. Онынъ аты сый, разылык пан айтылар, онынъ акында эс несилден-несилге коьшип, дайымга сакланар. Рустамнынъ яшавы – оьсип келетаган ясларга ийги коьрим, Аталыкка уьйкен суьйимнинъ белгиси болып калар.
Г.Нурдинова.
Суьвретте: Рустам Бораев.
