Дагестан етекшиси Сергей Меликов ава шартлары ман байланыста куьшли ямгырлардан зыян алган баьри республика яшавшыларына тийисли коьмек этилееги акында билдирди. Керекли тапшырма берилди оперативлик штабынынъ сырагылары бойынша.
Муниципаллык комиссиялар уьй-уьйге кирип, кайдай зыян келтирилгенди эсапка алып, баалайдылар. Бас деп коьмек этилинеек энъ куьшли зыян келтирилген Махачкала эм Хасавюрт районларынынъ яшавшыларына.
Аьли уьшин авыр аьл сакланады Хасавюрт районында, онынъ ериндеги доьрт авыллар (Адильотар, Кадыротар, Тутлар эм Новый Цилитль) яшавшыларын баска ерге коьширмеге туьсти. Мунда турак уьйлерге эм инфраструктура объектлерине зыян келтирилген. Сергей Меликовтынъ тапшырмасы бойынша районга ДР Оькиметининъ председатели Абдулмуслим Абдулмуслимов профильли министерстволарм ман бирге барып келген.
«Аьдемлердинъ кавыфсызлыгы уьшин кайдай косымша шаралар коьрилмеге керекти белгилемеге тийисли, – деди Сергей Меликов.
– Хасавюрт районында туьзилген аьл тагы да бизим бирлигимизди коьрсетти – чрезвычайный аьл калдыклары ман биргелесте МЧС куллыкшылары,
власть органлар ваькиллери, ыхтыяр саклавшылар эм конъысы авылларынынъ яны авырыган яшавшылары куьреседилер.
Аьли коьп аьеллерге енъил тувыл – аьдемлер оьз уьйлери, ювыклары, келеектегиси уьшин кыйналадылар. Ол зат, оьзек те, анълавлы. Эм олар ялгызлыкта калмаслар. Биз кыйынлы аьллерге туьскен аьр кимге коьмегимизди тийгистип, эм аьдемлерге аьдеттеги яшав кебине келуьв уьшин колдан келген баьри ярдамымызды этеекпиз, – деди республика етекшиси. Кыйынлы аьлге калган йолдасларга коьмек этуьвге Ногай район яшавшылары да оьз уьлислерин костылар: азык-туьлик, кулланувга керекли алатлар йыйналган автокоьлик каза болган ерге йол алды.
Баска муниципалитетлер йогары аьзирлик коьруьв режиминде куллык эткенлер, соны ман гражданларга келтирилген онъайсызлыкларды ериерлери мен эсапка алмага эп болган.