Озган юмадынъ ишинде Дагестан Республикасынынъ Оькиметининъ председатели Абдулмуслим Абдулмуслимов Халк Йыйынынынъ 54-нши сессиясында
шыгып соьйлеген докладында 2025-нши йылдынъ ис сырагыларын келтирди. Оьз соьйлевинде премьер-министр озган йыл тебенли оьсуьвдинъ, социаллык
тармагынынъ беркленуьвининъ эм инфраструктурадынъ янъырувынынъ заманы болганын белгиледи.
А.Абдулмуслимовтынъ айтувы ман, власть органлары оьз ислевинде биринши орынга аьдемлерди эм социаллык тармагын саладылар. Озган йылдынъ
ишинде коьпбалалы аьеллер коршаландылар, осал аьлде калганларга, СВО катнасувшыларга эм олардынъ аьеллерине коьмек этилинди. Инфраструктура
яктан премьер-министр регионда Чиркей-Махачкала-Каспийск сув оьткеруьв станциясы тезден ислеп баслаягын айтты. Онынъ ислеви мен Махачкала эм Каспийск калаларынынъ сув ман канагатланувы коьпке сапатлы эм сенимли болаяк. Солай ок туризм эм курылыс тармакларда проектлер яшавга
шыгарылаяк.
А.Абдулмуслимовтынъ айтувы ман, республика бас деп стратегиялык проектлерге маьне береди. Федеральли «Кавказ» трассадынъ кеби ийгиленген, Хасавюрт эм Дербент калаларды айланув йоллардынъ курылысы бардырылады, Махачкала айланув йолын салув бойынша проект каралган.
Премьер-министр Дагестаннынъ аграрлык секторын республикамыздынъ тиреви деп тагы да бир кере белгиледи. 2025-нши йыл продукция асыллавдынъ
саны, алдынгы йылга коьре, 3,1 процентке оьскен. Онынъ айтувы ман, халклар, миллетлер ара ийги байланыслар болувы республикамыздынъ оьрленуьвине демевлик береди. Баска тармаклар бойынша кайдай уьстинликке етискени акында да айтты ДР Оькиметининъ председатели Абдулмуслим Абдулмуслимов.
– Бизим бас борышымыз – республикамызды ийги яшавга, куьшли экономикага онъайлы этпеге, – деди премьер-министр.
Докладтынъ сырагылары Дагестан Аькимбасы Сергей Меликовтынъ эм премьерминистри А.Абдулмуслимовтынъ етекшилеви астында власть органлары дагестанлылардынъ яшав сапатын ийгилендируьв ниет пен аьрекетлейтаганын ыспатлады.
Г.Бекмуратова.