Ногай район орталыгы Терекли-Мектеб авылдынъ автостанциясы. Соны солай ок сав районымыздынъ ялгыз бир автостанциясы демеге де боламыз. Муннан
куьн сайын республикамыздынъ, конъысы регионлардынъ авылкалаларына карап автобуслар, маршруткалар юредилер. 1990-ншы йыллардынъ басында ол сол замандагы Ногай район басшысы, Дагестан Республикасынынъ Госсоветининъ агзасы Аскерхан Аджиевтинъ аьрекети мен курылган. Соннан бери 30 йыллардан артык мезгил озып барады.
Оьзинъиз билгенлей, заман деген дуныяда бир затты да аямайды: бийик мазаллы тереклерди де, тавлардагы каты тасларды да. Сол шаклы йыллардан бери район автостанциясынынъ алдындагы автокоьлик токталатаган майданы да тозып, ер-ери шукырларга айланып, боьтен де куьз-кыс айларында йыйылган шандак сувлардан аьдем юрип болмайтаган эди. «Бу автостанциядынъ алдын бирев де коьрмейтаган болаяк?» – деген ой неше аьдемге де келген болар.
Соны эске алып, янъыларда ерли Терекли-Мектеб авыл администрациясынынъ куьши мен автостанциядынъ майданына капиталлык ярастырув ислери
юритилип басланды. Меканнынъ алдына кум, оннан сонъ гравий тасы тоьгилип, уьйкен куватлы техникадынъ аркасы ман тапталып туьзетиледи. Бу ислер кутылган сонъ мунда асфальт-бетон тоьселеек.
– Автостанцияга ярастырув куллыклары «Автостанция ерининъ майданын коьрклендируьв» деп аталган айырым проект бойынша йыл узагында юритилееклер, – дейди Терекли-Мектеб авыл администрациясынынъ аькимбасы Марат Кулунчаков. – Мунда тек мекан алды тувыл, соны ман бирге арты да ярастырылаяк. Бу баьри майдан оьлшеми 160 квадратлы метр болатаган болса, биз 560 квадрат метр ерди туьзетеекпиз. Автостанциядынъ ерине сув
йыйылмасын деп соны тайдырув уьшин 3 дренаж куйылары курылмага каралады. Сонынъ азбарын да кораламага ниет этемиз. Мекан артына янъы аьжетхана салынаяк. Баьри куллыклар биткен сонъ автостанция ерине яс тереклер де олтыртпага суьемиз. Оннан сонъ, эгер йыл ызына авыл бюджетинде
акша карыжы экономия эсабында калгандай болса, автостанциядынъ меканы да ярастырылаяк.
Бу яваплы куллыкларды яшавга шыгармага солай ок авыл ериндеги айырым меценатлар да (олар атларын атамаска тилегенлер) коьмек этедилер.
Ярастырув ислери подрядчик, предприниматель Тагир Тенгизовтынъ байыр организациясынынъ техникасынынъ аркасы ман юритилип туры. Элбетте, этилинип турган ислер уьшин разылыгымызды билдиремиз эм солар баьриси де яшавга шыгарылганын йораймыз. Аьдемлер йыйылатаган авыл
ортасындагы ялгыз бир автостанция ери де, меканы да заман йорыгына келисли эм онъайлы болмага тийисли.
М-А.Ханов.
Суьвретте: Терекли-Мектеб авыл автостанциясынынъ майданы ярастырылады.
