Янъыларда Халклар ара лабораториялык диагностика бойынша куллыкшыларынынъ куьни белгиленди. Аьлиги замандагы савлыкты саклав тармагын оларсыз коьз алдынъа аькелуьв бек кыйын. Лаборатория куллыкшыларынынъ берген явабы ман авырыйтаган аьдемнинъ маразынынъ коьп ягыннан дурыс эм тез етимисли эмленуьви байланыслы.
Ак халаттагы аьдемлердинъ арамызда сыйы бек уьйкен, неге десе ден савлыгымыз аз-маз осалланганын сезсек, биз бириншилей, сол кеспи иелерине йол аламыз.
Сол ак халатты киймеге бала шагыннан алып мырат этти Ногай районнынъ балалар уьшин поликлиникасынынъ лаборанты Курасхан Оразлиева. Ол Ногай
районынынъ Куьнбатар авылында 1968-нши йылдынъ тамбыз айынынъ 6-ншы куьнинде тувган. Ногай район орталык больницасынынъ поликлиникасында Курасхан Багувовна Дагестан медициналык училищединъ фельдшер-лабораториялык боьлигин тамамлаган сонъ, 1988-нши йылдан алып, аьрекетлеп
келеди. Сол кеспиди сайлавда, ога А-Х.Джанибеков атындагы орта мектебинде коьп йыллар бойы орыс тил эм адабиятыннан филолог болып аьрекетлеген
аьптеси Рыслыхан Багувовна йол коьрсеткиш болды. Буьгуьнлерде яшавга айланган сол маслагаты уьшин кыскаяклы ога бек муьсиревли. Сол суьйикли ис аьрекетине ол яшавынынъ 38 йылларын багыслап келеди. Оьз куллыгын йогары оьлшемде билген, оны яваплы, намыслы бардырып
келген ис аьрекетши куьн сайын балалар уьшин район поликлиникасында 30-40 савлыгын тергемеге келген янъы тувган саьбийлерден алып 18 ясындагы оьспирлерге дейим канагатлап келеди.
Куьн сайын онынъ кабинетининъ касында шерет туьзилгенин коьрмеге болады. Коьп йыллар артта лаборант Курасхан Багувовна эм онынъ ис йолдаслары каннынъ туьрли тергевлерин кол ман лабораториялык микроскоп аркалы толтырып келген болса, буьгуьнлерде оны янъы аьлиги заманнынъ алаты – гематологиялык анализаторы авыстырган. Сол суьйикли кесписи бойынша 1988-нши йылдан алып савлай районнынъ уьйкен яшавшыларынынъ,
2025-нши йылдан алып балалар уьшин поликлиникасында саьбийлердинъ савлыгын саклавда каныгыслы ислеп, суьйген кесписине савлай берилип келеди. Сол затка район яшавшылары, балалардынъ ата-аналары билдиретаган уьйкен разылык соьзлери шайыт боладылар. Савлыкты саклав тармагында намыслы иси, авырыйтаган аьдемлерди йогары оьлшемде канагатлавы эм йогары кеспилиги уьшин ол район администрация, район орталык больницасынынъ етекшилеви атыннан Сый грамоталарга тийисли этилген.
Курасхан Багувовнага берк ден савлык, аьел онъайлыгын, куллыгынъызда ийгиликлер, янъы бийикликлер, етимислер йораймыз.
Г.Рамазанова.
Суьвретте: Курасхан Оразлиева.