Тезлик ярдам куллыкшыларынынъ куьни россия календаринде йыл сайын коькек айынынъ 28-нши куьнинде белгиленеди. Оны медицина тармагында энъ авыр кеспилерининъ ваькиллери белгилейдилер.
Оларга авыр аьллеринде, санавлы такыйкалар ишинде диагноз салып, аьдемнинъ яшавын куткарув бойынша дурыс токтас алмага туьседи. Буьгуьнлерде оьз бактысын енъил болмаган, ама элине пайдалы аьрекетине уьйкен суьйим, берген антына алаллык коьрсетип, халкынынъ савлыгын саклавга оьз куьш-куватын, усталыгын багыслап келген кеспи иелерининъ саны аз тувыл.
Мине 35 йыллар бойы Барият Ажувовна Курганова юреги мен сайлаган кесписине алаллыгын коьрсетип келеди. Онынъ уьшин кесписи тек суьйикли ис болып калмай, суьйиниш аькелетаган юрек шакырувы да болады. Барият Ажувовна Ногай районынынъ Терекли-Мектеб авылында 1972-нши йылдынъ караша айынынъ 5-нши куьнинде тувган. А-Х.Джанибеков атындагы мектебте билим алып, кызды бала шактан медицина куллыкшысы боламан деген
мырады Кизляр каласындагы медучилищединъ сестринское дело боьлигине аькелди.
Барият Ажувовна 1991-нши йылдан алып, айтпага, Ногай районынынъ орталык больницасынынъ хирургия боьлигинде, тезлик ярдамынынъ пунктында, оннан сонъ врачка дейим кабинетинде медсестра, буьгуьнлерде болса, тезлик ярдамынынъ фельдшери болып ис сулыбын байытып, етимисли аьрекетлейди. Ол аьр бир шакырув бойынша тезлик ярдамы ман авырыганларга заманы ман етип, фельдшерден талаплайтаган биринши коьмегин тийдирип, мараздынъ аьли авыр болса, оны больницага тез ок еткереди. Сол ис аьрекети медициналык куллыкшысыннан тек терен билимин, практикалык усталыгын тувыл, туьрли аьллеринде оьзин тутып, оьз алдына керекли токтасты алып болувды аян талаплайды.
Барият Кургановадынъ сол коьпйыллык ис аьрекети район администрациядынъ Сый грамотасына тийисли этилген. Ис аьрекетинде тек яваплы куллыкшы болып калмай, Барият Ажувовна эки аьвлетлерин, айтпага, Фатирады эм увылы Оразбайды оьстирип, оларды туьз яшав йолына онълаган наьсипли ана да болады. Фатира анасынынъ йолын ызлап, Пятигорск каласында медициналык колледжин тамамлап, оьз кесписи бойынша аьрекетлейди. Оразбай увылы буьгуьнлерде Ростов каласындагы Россия МВД юристлик институтынынъ 4-нши курсынынъ студенти. Энесининъ куьезин Айлин йиени оьстирип келеди. Тезлик ярдамынынъ фельдшери Барият Ажувовнады эм онынъ ис йолдасларын бу кеспилик байрамы ман кутлай келип, енъил болмаган, халкынынъ ден савлыгын арттырувда пайдалы ис аьрекетинде бийик етимислер, яшав онъайлыкты, коьп ийгиликлер сагынамыз.
Г.Нурдинова.
Суьвретте: Барият Курганова.
