Аьелде увыл тувса, коршалавшы тувды деп айтамыз. Оны Аталыкты, аьелин, уьйин коршаламага керек деп тербиялайдылар. Буьгуьнлерде биз баьримиз де шайыт боламыз – бизим кеделер бирден уьйкен болып, Аталыгын коршалавга атланадылар. Олар – коршалавшылар, уллы Россияды яклап, куьшин аямайдылар.
Иман Хамид увылы Рахимбердиев Ставрополь крайынынъ Нефтекум районынынъ Коясыл авылында тувып-оьскен. Мунда ол мектебти битирди, сонъында Ставрополь каласындагы «Авиценна» медициналык колледжине окымага туьсти. Эр борышын Иман Ярославль каласында ПВО аьскерлеринде толтырды.
Арувзат Шахислам кызы Рахимбердиева увылларын ялгыз оьзи саклады. Денислам ман Иманга ана – энъ де аьзиз эм ювык аьдем. Анасы оларга тек суьйим эм йылувлык беруьв тувыл, кеделерин шынты эр кисилер этип оьстирди. Уьйкен увылы Норильск каласында яшайды, Иман доьртинши йыл согыс спецоперациясында куллык этеди. Анага куьнде де увылыннан хабар куьтип турмага кыйынлы. Аьр бир язган соьзи, аьр бир занъ согувы Арувзат Шахислам кызына – уьйкен суьйиниш.
«Анам, мен сав, баьри зат та аьруьв» деген соьзлер анадынъ юрегин тынышландырадылар. Увылы уьшин тилек тилеп, анасы оны ман оьктемсийди.
Иман Рахимбердиев СВО ерине 2022-нши йылдынъ казан айынынъ 2-нши куьнинде мобилизация бойынша кеткен. Херсон йорыгында куллык этеди. Согысувлардынъ бирисинде каты яраланган эди, болса да алдышылыкка кетти, неге десе онынъ бас борышы – явды урмага.
– Бизим элимиз кайзаманда да аьдиллик уьшин согыскан. Буьгуьнлерде сол аьдилликти биз туьзбеге, янъыртпага керекпиз. Сол – бизим киели исимиз. Енъуьв келер элимизге, сога шекленмеймиз.
Баьри аьскершилер де Аталыгына, тувган ерине куллык этедилер, – деп айтады Иман Рахимбердиев.
Ол «За боевые отличия» медали мен савгаланган. Быйыл Иманга, Аллах буюртса, яй куьнлеринде 30 яс толаяк. Сол куьнди мен йигитимизге кардаш-тувганларынынъ тоьгерегинде карсы алганын йорайман. Келсин элимизге тынышлык эм баьримиз  де куьткен Уллы Енъуьв.
Г.Бекмуратова.
Суьвретте: И.Рахимбердиев.