Ногай ясларымыз Россия элимиздинъ кайсы еринде яшаса да, Кудай ман берилген талаплары, оьнерлери артып, туьрли тармаклар бойынша етимислер коьрсетип, енъуьвшилер сырасында ногай халкынынъ атын айттырып келедилер. Оьзин спорт тармагында сынап айтатаган сондай етимисли ясларымыздынъ бириси – Амин Мирсултанович Муллаев. «Атм Москва» клуб командасынынъ тербияланувшысы, спорт устасына кандидат Амин Муллаев – Москва кала Бириншилигининъ енъуьвшиси, сол ок каладынъ панкратион бойынша чемпионатынынъ коьп кере баргы иеси, баска болып, Россия Бириншилигининъ самбо бойынша енъуьвшиси. Амин усталыгын оьстируьв уьстинде каныгыслы куллык этип келеди. Ногай яс янъыларда оьткен «Лига наций» Москва бойынша турнирининъ де енъуьвшиси болып шыкты. Бу озган оьзгерис ога келеекте оьтеек маьнели Россия Бириншилигинде катнаспага йолды ашты.
Асылы ман Амин Муллаев – Дагестаннынъ Ногай районынынъ Терекли-Мектеб авылыннан. Буьгуьнлерде ол Элимиздинъ бас каласы Москвада аьели мен яшайды. Ястынъ бала шактан спортка уьйкен суьйими ога уьстинликли окымага буршавлык бермейди, кенем де ол – мектебте ийги окувшылар сырасында.
Буьгуьнлерде Амин Россия эм Евразиядынъ панкратион спорт кеби бойынша оьтеек чемпионатларына оьз тренери мен белсенли аьзирлик коьреди. Янъыларда «Лига наций» турниринде катнасувы Аминге келеекте маьнели чемпионатлары алдында усталыгын оьстирмеге, кызыксынган спорт кебининъ коьп сыхырлыгын билмеге амал болды.
Келеекте де Аминнинъ спортта бийик уьстинликлерге етисуьвде иркилмей алды бармага, оьз тамамларын оьстируьвде белсенли аьрекетлемеге ниети бар. Яс спортсменге алдыда пакратион бойынша Россия эм Евразия чемпионатларында биринши орынды бийлеп, енъуьвши болып шыкканын йораймыз.
Амин, йолынъ бийикликлерге етисуьвде дайым ашык эм таза болсын! Кайзаманда да биринши Исырада бол!
Г.Нурдинова.
Суьвретте: Амин Муллаев.