Янъыларда Ногай районга Уллы Енъуьвдинъ 81-нши йыллыгына багысланган эм Россия Халклар Бирлик йылы бойынша озгарылган «Халклар бирлиги –
Россиядынъ куваты» деген белги астындагы республикалык автоювырувынынъ катнасувшылары келдилер. Соны ман байланыста Ф.Капельгородский паркындагы янлары курман болган аьскершилер эстелигининъ касында митинг озды. Мунда бизим элимиздинъ баьтир бетлерининъ тарихин саклав ман байланыслы ортак мырады болган туьрли яслы аьдемлер йыйналдылар, айтпага, район администрация ваькиллери, организациялар эм учреждениелер
етекшилери мен куллыкшылары, окувшылар.
Белгиленген автоювырув Махачкаладан йол алган эм Сырт Дагестаннынъ калалары ман авылларында оьтеек. Патриотлык акцияды «Енъуьв» фондынынъ
регионаллык боьлиги эм «Дагестан Республикасынынъ офицерлер союзы» регионаллык ямагат организациясы ДР Экономика эм территориаллык оьрленуьвининъ министерстволарынынъ коьтергишлеви мен уйгынлаганлар.
Сыйлы конакларды эм йыйылганларды биринши болып Ногай район администрация аькимбасынынъ орынбасары Мурат Шадиев хошлады. Ол енъуьвши несилдинъ эрклиги бизим баьримиздинъ де эсинде яшайтаганын эм кайсымызга да коьрим болатаганын белгиледи.
Согыс, ис, Савытлы куьшлер эм ыхтыяр саклав ветеранлар советининъ председатели Акманбет Сангишиев бизим ердеслеримиздинъ туьрли несиллерининъ баьтирликлери акында айтты.
Россия Баьтири Загид Загидов Уллы Аталык согысы йылларында атайларымыз бизим наьсипли яшавымыз уьшин явды сокканларын эм бу куьнлерде СВО барысында яс несил йигитлик эм шыдамлык коьрсететаганын мутпага ыхтыярымыз йок экенин белгиледи.
Россиядынъ Балык ыслав спорт федерациясынынъ вице-президенти Завурбек Вагидов уьйкен оьктемлик пен Дагестаннынъ савлай тарихи бойынша онынъ халклары бир-бири мен бир де кавгалар юритпегени акында айтты. Ол яс несилге бир заманларда да Россия эм Дагестан халкларынынъ бирлиги эм тыпаклыгы акында мутпанъыз деген шакырув этти.
«Енъуьв» Ортакроссиялык ямагат фондынынъ Дагестан регионаллык боьлигининъ правлениесининъ председатели Ибрагим Ибрагимов Ногай район
аькимбасы Джамалутдин Эсиргеповка Дагестан Республикасынынъ ямагат яшавында белсенли катнасканы, яс несилди тербиялавда уьлис косканы, Уллы Аталык согысы йылларында янларын берген аьскершилердинъ эстелигин саклав эм ветеранларды коьтергишлегени уьшин Разылык хат тапшырды. Митинг эстеликке гуьл байламлар салув ман тамамланды. Биз баьтирлер акында эс саклаймыз эм эстелик эстафетасын яс несиллерге коьширемиз.
Н.Кожаева.
Суьвретте: митигтен коьринис.