Дагестан етекшилиги алдында курал айында куьн аьлиндеги маьселелерди заманында ок шешуьв мен, солай ок узак болжаллы проектлерди яшавга шыгарув ман байланыслы уьйкен оьлшемли борышлар турады.
Бас маьне ава шартлары ман байланыста язлык сув алувлар сырагыларын тайдырувга берилеек. Кенъеслерде зыян коьргенлерге акша тоьлев эм турак уьйлерди кайтадан тургызув ман байланыслы коьмек этуьв механизмлери ортага салынып ойласылаяк. Авыр аьлге туьскен гражданлардынъ аьризелерине айырым эс каратылаяк.
Курал айында Уллы Енъуьвдинъ 81-нши йыллыгы белгиленеек. Республикада шатлыклы шаралар оьтееклер: аьскер парады, «Оьлимсиз полк» эм «Енъуьв Байрагы» акциялар, солай ок ветеранларга сый оьрмет этуьв.
Сезимли оьзгерислер болаяк регионнынъ энергетика эм промышленность тармакларында. Шатлыклы аьлде Дербент СЭС (куьн коьзининъ саьвлелерининъ йылувлыгы ман аьрекет этетаган электростанция) ашылувы, солай ок «Салаватстекло Каспий» ООО предприятиесинде янъы производстволык линиясын кулланувга берилуьви планланады. «Эстелик бавлары» баславдынъ яшавга шыгарылувы бардырылып, Магарамкент районында аьскершилерге багысланып янъы сквер ашылаяк.
Дагестан етекшиси гражданларды туьрли соравлар бойынша кабыл этеек, солай ок эр борышын толтырувда ян берген аьскершилер аьеллери мен
йолыгысаяк. Дербентте согыс техникасын, самолетларды эм савытланувдынъ аьдетте болмаган уьлгилерин, данъклы «Лунь» экранопланды косып,
коьрсетуьв уьшин уьйкен оьлшемли «Патриот» паркы ашылаяк. Коьп оьзгерислер болаяк республикадынъ спорт яшавында: Мектеб футбол лигасынынъ финаллары, Дагестан эм Сырт Осетиядынъ йыйылма командалары ара эркин куьрес бойынша халклар ара матчлар, солай ок конкурс бойынша Минимущество кубогына ярыслар оьтееклер. Ай бойынша актуальли соравларга багысланган кайбир маьнели кенъеслер озгарылувы планланган: сув
алган ерлерден гражданларды коьшируьв, коррупция ман куьресуьв, сатып алув аьрекетин пайдалыгы ман юритуьв, ерлердинъ комплесли оьрленуьви, билимлендируьв учреждениелердинъ курылысы, аьскерге шакырув кампаниясын озгарув эм каты коммуналлык калдыклар ман пайдаланув бойынша инфраструктурады оьрлендируьв.
Айырым кенъес савлык саклав тармагынынъ оьрленуьв соравларына багысланаяк, парызлы медстрахованиесининъ Территориальлик фондынынъ, Росздравнадзор, Роспотребнадзор, ыхтыяр саклав органлар эм байыр медициналык организациялар ваькиллери ортакшылык этип.