Чернобыль атом электростанциясында болып озган категе 40 йыл толувы ман байланыста Ногай район ЧАЭС-нда болган баьлеказадынъ калдыкларын тайдырув ислеринде катнасувшы ердеслер
Орта-Тоьбе, Уьйсалган, БатырМурза авылларында болдылар. Орта-Тоьбе авылында чернобыльшилер бу авылдан авариядынъ ызларын тайдырувда катнаскан Ю.Аюповтынъ, А.Кошербаевтинъ, А.Тилековтынъ, Н.Дуйсакаевтинъ, Б.Эрежеповтынъ сыйына салынган эстеликли белгидинъ янында авыл
маданият уьйининъ, китапхана етекшилерининъ эм орта мектеб окувшыларынынъ куьшлери мен оьткен митингте ортакшыладылар. Сондай эстеликли шаралар Уйсалган эм Батыр-Мурза авылларында да болып оьттилер.
Айтылган авыллардагы шараларда катнаскан Ногай район аькимбасынынъ орынбасары Мурад Шадиев, район Ямагат палатасынынъ председатели Эльмурза Саитов, район Ветеранлар советининъ председатели Акманбет Сангишиев, мектеб директорлары Сапиет Межитова, Зульфия Кожаева, Айгуль Менласанова эм баскалар Чернобыльде 40 йыл артта болып оьткен баьле-каза дуныяда энъ де уьйкен атом катеси экенин, сонда элимиздинъ биринши буйырыгы ман янын-канын аямай ортакшылык эткен аьдемлер эм олардынъ санында бизим шоьл йигитлеримиздинъ баьтирлигин белгиледилер. Олар соны ман бирге чернобыльшилерге юрек разылыгын да билдирдилер. Арамыздан бу куьнлерге етпей дуныядан тайган ЧАЭС катнасувшыларын йылы соьзлери мен эскердилер.
Неше йыллар озса да, сол кайгылы куьнлер эм соларда уьйкен йигитлик коьрсеткен аьдемлер мутылмайды эм мутылмаяк. Соны ман бирге бу кайгылы мереке дуныядагы баьри аьдемлерге эм оьсип келеяткан несиллерге аьр заманда да сак болынъыз, Ер планетамызды сондай баьле-казалардан аман
саклайык деген шакырув болады.
Чернобыль АЭС-нда болып оьткен баьле-казадынъ калдыкларын тайдырувда катнасувшылардынъ Ногай район советининъ председатели Руслан Кунтувганов, шыгып соьйлеген чернобыльшилер оьз эскеруьвлери мен боьлистилер. Оларга сый этилинип оьткерилген шаралар уьшин оьз разылыкларын билдирдилер.
М.Ханов.
Суьвретте: Батыр-Мурза авыл орта мектебинде чернобыльшилердинъ сыйына оьткерилген шарада.