Юма басында ДР Халк Йыйынынынъ Президиумы парламент спикери Заур Аскендеровтынъ басшылавы астында Халк Йыйынынынъ 56-ншы сессиясынынъ
ис куьнделигин эм исин бардырув йосыгын беркитти. Кенъес исинде ДР Оькиметининъ Председателининъ исин кесек заманга юритуьвши Магомед Рамазанов
ортакшылык этти.
Ис куьнделигин ортага салып ойласувдан алдын Заур Аскендеров ДР Аькимбасындагы Аксакаллар советининъ агзасы Ислам Магомедовка ДР Халк Йыйынынынъ Председателининъ аты ман белгиленген саьатти тапшырды.
Туьнегуьн, 13-нши май куьнинде, ДР Халк Йыйынынынъ 56-ншы сессиясы озгарылды. Онынъ ис куьнделигинде ортага салынып 26 соравлар ойласылды.
Парламент депутатлары Дагестан Республикасынынъ Оькиметининъ Председателининъ орынына Магомед Рамазановтынъ кандидатурасын ортага салып
ойластылар. Дагестан Республикасынынъ Аькимбасынынъ исин кесек заманга юритуьвши этип беркитилген Федор Щукин алдынгы правительстводы отставкага йиберген эм Магомед Рамазановты кесек заманга премьерминистр орынына беркиткен эди.
Магомед Рамазанов ЧС калдыкларын тайдырув ислерди ювык заман ишинде власть органларынынъ аьрекетининъ бас йоллары болмага керек деп белгиледи.
«Буьгуьн ис аьрекеттинъ бас йолларынынъ бириси деп аьдеттен тыскары аьллердинъ калдыкларын тайдырув бойынша куллык этуьв болады. Бу ис федераллык эм регионаллык службаларынынъ катнасувы аркасы ман кешеси-куьндизи юритиледи.
Кыйынлык коьрген аьр бир аьдем ога ярдам этилуьвин сезбеге, онынъ маьселелерине эс берилмей калмайтаганын сезбеге керек болады», – деди ол.
Дагестан Республикасынынъ Аькимбасынынъ куллыгын кесек заманга юритуьвши Федор Щукин: «Дагестан Парламенти буьгуьн Магомед Рамазановтынъ
кандидатурасын ДР Оькиметининъ Председателининъ ис орынына салувды колтыклады. Магомед Исрафиловичтинъ согыс эм гражданлык куллык этуьв йылларында йыйнаган етекшилев сулыбы уьйкен. Онынъ кандидатурасын Россия Президенти Владимир Путин макул эткен, сол зат йогары дережеде ат казанган
сеним акында айтады.
Боьтен де оьз кеспили касиетлерин Магомед Рамазанов республикамызда болган аьддеттен тыс аьллердинъ калдыкларын тайдырувда коьрсетти. Дагестанлылар
власть органларыннан ашыклыкты, дурыс карарларды, яваплылыкты эм салынган борышларды заманында толтырылганын куьтедилер».
Соны ман, Дагестан Республика Оькиметининъ Председатели ис орынына бир тавыстан Магомед Рамазанов беркитилди.
Сессия барысында депутатлар ДР Ямагат палатасынынъ 2025-нши йылдагы аьрекети акында онынъ йылсайынлык докладын тынъладылар. Солай ок сессияда
тоьмендеги тармаклар ман (гражданлардынъ савлыгын саклав, муниципаллык службасы, оьксиз балаларды социаллык яктан колтыклав, табиатты эм анъшылав ресурсларды саклав, турак уьйлерди капиталлык ремонтлав, физкультура эм спорт, патшалык муьлкти приватизациялав) байланыслы кайбир республикалык
законопроектлерге туьрленислер киритуьвлер ортага салынып ойласылды. Солай ок ДР Ямагат палатасынынъ янъы агзалары беркитилди.
Бизим хабаршы.