Бизим аьр биримиз уьшин энъ де маьнели байрам – Енъуьв куьни алдында Кадрия атындагы мектебинде «Оьлимсиз полк» акциясы оьтти. Бу оьзгерис Уллы Аталык согысы йылларында бизим уьйкен атайларымыз баьтирлигине сый этуьвдинъ эм эстеликтинъ уьйкен байрамына айланды. Енъуьвшилер немерелери олардынъ наьсипли
яшавы уьшин оьзлерин аямай фашизм мен куьрескен атабабаларынынъ суьвретлерин уьйкен оьктемлик пен алып бардылар.
Уллы Аталык согысында совет халкынынъ енъуьвининъ 81-нши йылына багысланган шатлыклы линейкага окытувшылар, окувшылар, олардынъ ата-аналары, Уллы Аталык
согысынынъ ветеранларынынъ балалары, СВО катнасувшылары эм ювыклары йыйылдылар.
Россия гимни шалынувы ман юнармеецлер РФ байрагын коьтерип, йыйылганлардынъ алдына шыктылар. Шарады мектеб етекшисининъ тербиялав иси бойынша орынбасары Эльмира Савкатова ашты.
Уллы Аталык согысынынъ ветераны, Данък орденлерининъ толы кавалери Алимхан Асановтынъ кызы Амина Асанова атасынынъ аьскер йолы, йигитлиги акында хабарлады.
«Шоьл тавысы» республикалык газетасынынъ бас редакторы «Оьлимсиз полк» сырасында баьтир атайлардынъ суьврети мен абытлав – бек уьйкен сый эм оьктемлик экенин белгиледи. Мектеб етекшиси Альфия Акимовадынъ балаларга каратылган соьзи туьрли несил Аталык коршалавшылар йигитлигин оьрметлев мен байланыслы эди. Аьне
соьйтип, несиллер байланысы аркалы Аталыкка шынты суьйим тербияланады.
– Енъуьв куьни – ол шынтылайын да уллы халктынъ уллы байрамы. Бу байрам куьнлерде бизим республикадынъ эм элимиздинъ яшавшылары оьктемлик пен авыр согыс йылларда бизим бойсынмаслыгымыз эм эркинлигимиз уьшин куьрескенлерди эслерине аладылар. Биз аьр бир аьскершиердесимизди, тылда енъуьвди ювыклаткан куллыкшыларды билемиз эм аьр дайым да эсимизде саклаякпыз, олар – шынты баьтирлер, – деди оьз соьзинде Альфия Амирхановна.
Йыйылганлар, баьри де енъуьвши несилге разылыгын коьрсетип, несиллердинъ бир де уьзилмес байланысын белгилеп, мектеб азбарыннан Баьтирлер Аллеясына карап йол
алдылар. «Оьлимсиз полкын» окытувшысы Эрманбет Ораков етти.
Аьр бир портрет – тек суьврет болып калмайды, ол эркликтинъ, шыдамлыктынъ эм Элине суьйимнинъ тарихи.
«Оьлимсиз полк» акциясы – ол биз оьз баьтирлеримизди эсимизде саклайтаганымызды, оьктемсийтаганымызды эм оьрметлейтаганымызды аян коьрсетеди. Бу ийги аьдет бизди биргелестирсин эм тынышлык уьшин ийги ислерге даьврендирсин.
Нурият Кожаева.
Суьвретте: «Оьлимсиз полк» катнасувшылары.