Аьр бир оьмирдинъ оьз баьтирлери бар. Бизим заманнынъ баьтирлери – ол согыс спецоперация катнасувшылары. Бу куьнлерде туьрли миллетли Россия
аьскершилери, Элимиздинъ кызыксынувларын коршалав уьшин куьресеятып, йигитлик, йигерлик эм шыдамлык коьрсетедилер. Эрклик эм коркынышсызлык оларга Уллы Аталык согысынынъ баьтирлериннен коьшкен. Шексинмеймиз, бу куьнги согыс спецоперацияда ортакшылаган баьтирлер акында эстелик те сондай болып оьмирлерге сакланар.
Бизим таза аспанымыз, патшалыгымыздынъ онъайлыгы уьшин куьрескен аьр бир аьскершидинъ атларын ердеслер, боьтен де яс несил билмеге керек.
Сонынъ уьшин СВО катнасувшылары кыска болжаллы тыншаювга келген заманда, «Шоьл тавысы» республикалык газетасынынъ куллыкшылары олар ман коьрисип, хабарламага яде болса редакцияда йолыгыслар уйгынламага шалысадылар.
Янъыларда кыска болжаллы тыншаювда согыс спецоперация катнасувшысы Шахмурад Ганиев болды. Ол ТереклиМектеб авылында коьпбалалы татым аьелде оьскен.
Онынъ ата-анасы эм абалары ялгыз увылын эм аданасын уьйкен суьйимге эм каьр шегуьвге ораганлар.
Шахмурад бек танъ, аьр дайым да ярдамга аьзир яс болып оьсти. Сондай болып калды ол мектебти окып кутарып, Москва эм Сургут калаларында ислеген заманларда да.
Согыс спецоперация басланган биринши айлардан алып, Шахмурад Сагынбек увылы СВО озып турган ердеги янъылыкларды тынълап турды,
элимиздинъ, онынъ яшавшыларынынъ кавыфсызлыгы эм онъайлыгы акында ойланып. Сонъ 2025-нши йыл ол РФ Коршалав министерствосы ман контракт беркитип, кайзаманнан бери оны кыйнаган соравын шешти. Бизим ердесимиз Херсон областинде, бир аралда пулеметчик болып куллык этеди. Ол аьрекетлеген аралды эм боьликти белгилемеге ярамайды. Душпан турган ер мен Шахмурадтынъ отряды орынласкан ерди бир неше шакырым ер айырады. Ногай яс оьз аьскер йолдаслары ман явдынъ орынласкан ерине кирген, тийисли ерге «тилди» еткерген, туьрли яваплы борышларды толтырган куьнлери де аз болмаган. Ол службасын бардырган аралда аьр бир абыт энъ ызгы болмага
болады, неге десе нацистлер ер-ерге «шоколадка», «лепесток» миналарын эм баска «савгалар» таслаган.
Шахмурад Ганиев службасы акында коьп айтпага суьймеди, ама аьскер йолдаслары эм согыс кардашлык акында йылувлык пан айтты.
– Уьйге кайтып, ювыкларды коьрип суьйинесинъ, тек согыс спецоперациясы озган ерге кери тарткандай бир сезим болады.
Йок, урыслар излеп тувыл.
Онда мага ювык кардаш болган, аьскер йолдасларым калган. Фронтта яшавдынъ, тынышлыктынъ баасын анълайсынъ.
Тынышлы яшавда аьдемлер неди де уьйкен маьселеге санайдылар. СВО — да болса баьри зат та баскалай. Шынты кавыфлык онда маьселе. Йогарыда ушкан дронлар, яв салган «растяжкалар», окопка туьскен граната – мине бу затлар сени кайгыртадылар. Йолдаслардынъ алаллыгынынъ баасын да онда анълайсынъ. Мен билемен, бир де шексинмеймен, не болса да, мени аьскер йолдасларым тасламаяк, мен де оларды дав майданнан яралы яде ян берген болса да шыгарарман.
Авылымыздынъ, Элимиздинъ яшавшыларынынъ коьтергишлеви акында да бир-эки соьз айтпасам болмас. Блиндажлардынъ агашы дымкыллыктан ширийдилер, соны
авыстырмага эм баска куллыкларга алатлар керегеди. Бизди калаларда аьскер кийим мен коьрип, туькен иелери неше де тегин алатлар бергенлер. Тувган Еримизден де йигитлерге яхшы коьтергишлев келеди, тек бизим аралга олар етип болмайды, – дейди Шахмурад Ганиев.
Уьйде Шахмуратты аьзиз анасы, эки суьйикли кызы, хатыны Айгуль эм абалары аман-болсын деген тилек тилеп куьтедилер. Шахмурадтынъ анасы Мархаба Биюв кызы коьзяслары ман увылынынъ бала замандагы эскеруьвлери мен боьлисти, оны ман аьр дайым да оьктемсигени акында айтты. Яв ман куьрес юриткен коркынышсыз ногай йигити
анасы ман юмсак эм каьр шегуьв аьлде соьйлегени сукландырмай, коьзкарасты кувандырмай болмады. Ол уста коллары ман бир алат та кулланмай анасына коьмек этти.
Бизим ердеслерге, Дагестанда тувган йигерли йигитлерге СВО-да ортакшылык этуьв Эл кызыксынувларын коршалав тек ис тувыл, ол – киели борыш.
Олар явды каты, аьскершиге тийисли кепте согадылар.
Баьтирлерди билуьв, эсте саклав эм оларга сый этуьв – Элге каратылган суьйимди коьрсетуьв болады. Яс несил шынты патриотизм тек соьзлерди тувыл, ислерди де куьтетаганын билсин деп, биз баьтирлеримиз акында эсти оларга еткерермиз. Бизим Россия уллы Эл, баьтирлер онынъ аьр бир муьйисинде бар. Аьскершиердеслеримиздинъ эрклиги
бизге яркын уьлги болады.
Аьр бириси олардынъ тек аьскерши тувыл, а тынышлы яшав ман байланыслы мырадлы, ойлы, сенимли аьдем болады.
Нурият Кожаева.
Суьвретте: Шахмурад Ганиев
