Кеспи байрамы – Россия предпринимательство куьни йылда да май айынынъ 26-ншы куьнинде белгиленеди. Ол Россия Президенти Владимир Путиннинъ 2007-нши йылдынъ 18-нши октябринде кабыл этилинип алынган указы ман токтастырылган. Байрам куьнин белгилев акында ой-токтас патшалыгымыз киши эм орта бизнести белсенлик пен
колтыклап баслаган 2000-ншы йылларда тувган. 26-ншы май куьни деп токтастырылганы да босына тувыл: 1988-нши йылдынъ сол куьнинде, совет гражданларына
организациялар – биргелес экономикалык аьрекетин юритуьв уьшин кооперативлер туьзуьвге ыхтыяр берилип, СССР-дынъ Оьр Совети мен «О кооперации СССР» законы кабыл этилинип алынган.
Россия предпринимательство куьнининъ мырады – экономикадынъ оьрленуьвине предпринимательлердинъ косатаган уьлисин белгилев. Байрам бизнесменлер алдында тувататаган маьселелерге эс каратув ман экономикада байыр баславдынъ туткан орынын баалав.
Аьдеттегинше, 26-ншы май куьнинде Россиядынъ туьрли калаларында администрациялардынъ, савдалав-промышленностьлик палаталар, бизнес-сообществолар эм баска организациялар колтыклавы ман туьрли шаралар озгарылады. Солардынъ арасында – шатлыклы шаралар (бизнес оьрленуьвине коскан уьлиси уьшин патшалык эм региональлик савгалар тапшырув), бизнес-форумлар эм конференциялар, билимлендируьв программалар, спейакциялар, выставкалар, тоьгерек столлар, бизнес-фестивальлер, предпринимательство бойынша ашык дерислер, конкурслар эм премиялар – мысалы, «Йылдынъ энъ ийги предприниматели».
Москвада йыл сайын Предпринимательство юмалыгы озгарылады. Ол бизнесменлерге, сонынъ ишинде бу аьрекет пен янъы каьрлеп баслаганларга, янъы байланыслар туьзбеге эм оьз проектлери мен шыгып соьйлемеге амал береди.
Любовь Уразаева.
Тоьменде, предпринимательлик аьрекети мен уьстинликли каьрлеп, оьз ердеслерининъ керексинуьвлерин эсапка алув ман регионда бизнестинъ оьрленуьвине, кишкей болса да, оьз уьлисин косатаган бизнесмен-кыскаяклылар акында окынъыз.