Кизляр районында Уллы Аталык согысында Енъуьв байрамы алдында СВО еринде янлары курман болган Аьскершилер атларын оьмирлетуьв бойынша бир неше шаралар озгарылып, 6-ншы номерли район мектебинде аьскерши Габибуллах Наврузовка эстеликли мемориаллык тактасы ашылды. Шарадынъ барысында йигиттинъ кардаш-тувганлары, районнынъ Депутатлар Йыйынынынъ председатели Эльдар Кадилов, Кизляр кала администрациясынынъ аькимбасы Шамиль Булаталиев, мектеб окытувшылары эм окувшылары ортакшылык эттилер. Олар савлайы да, Элимизге авыр заманларда оны коршалавга турып, янын курман эткен йигиттинъ эстелигине сый этип келген эдилер. Мемориаллык тактасын ашпага Эльдар Кадиловка, Шамиль Булаталиевке эм аьскершидинъ анасына ыхтыяр берилди. Такта ашылганнан сонъ, йыйылганлар онда
гуьл байламларын салдылар эм ян берген аьскершиди бир такыйка уьндемей турувлары ман эслерине алдылар.
Красновосход авыл мектебинде де согыс спецоперация барысында йигитлерше ян берген мектеб выпускниги Ильяс Курбановтынъ эстелигине багысланган мемориаллык тактасы ашылды. Шарада Кизляр район администрациядынъ аькимбасынынъ орынбасары Мурад Багандов, Красноармейский авыл аькимбасы Тедур Тедуров, яны курман болган йигиттинъ кардаш-тувганлары, баска болып, билимлендируьв ошакларынынъ ваькиллери катнастылар. Биринши соьз йигиттинъ анасына берилди.
Ол, Ильяс аьр кимге де авыр шакта ярдамга алгасаган, баскаларды тынълап болган, кенъ эм ашык юрекли аьдем болып оьскени акында эсине алып хабарлады. Мемориаллык тактасын ашпага Мурад Багандовка эм онынъ анасы Нупайсат Лабазановага ыхтыяр берилди.
Кизляр районынынъ Черняевка авыл мектебинде де СВО еринде аьскершилик борышын толтырувда ян берген аьскерши Дмитрий Исакиннинъ де эстелигин оьмирлетилди. Кизляр район администрация аькимбасынынъ биринши орынбасары Тимур Гаирбеков, аьскершидинъ кардаш-тувганлары, мектеб окытувшылары эм окувшылары, мемориаллык тактасын ашып, ердесининъ эстелигин бир такыйка уьндемей турувлары ман эслерине туьсирип, шешекейлер салдылар.
Бизим йигит ердеслеримиз тынышлык эм ярык келеектегиси уьшин бийик баады тоьлегенлер. Эндиги олардынъ атлары окув ошакларынынъ тарихине кирип, яс несиллерге дайымга уьлги болып калаягына соьз йок.
Суьвретте: шарадан коьринис.