Ногай районынынъ Калинин авылынынъ Бегали Куруптурсунов атындагы ипподромында йылсайынлык уьшинши кере атшабыс озгарылды. Шара ногай маданиятын таралтувына уьйкен уьлис коскан белгили ногай музыкант Бегали Куруптурсуновтынъ сыйына багысланган. Шатлыклы оьзгерис коьплеген сыйлы конакларды, авыл
яшавшыларын йыйнады. Хошлав соьзи мен «сельсовет Арсланбековский» СП МО аькимбасы Эдиль Акбердиев, ДР эм КЧР республикаларынынъ ат казанган артисти,
композитор Яхья Кудайбердиев, авыл ясуьйкени Авасхан Кульниязова, Бегали Куруптурсуновтынъ кардаш-тувганлары шыгып соьйледилер. Авыл поселениесининъ аькимбасы Эдиль Акбердиев баьрисин де Енъуьв куьни мен кутлады, Бегали Куруптурсуновты эсине алып, йылы соьзлер айтты.
– Бегали айлак ийги, танъ инсан эди. Ол бек суьетаган эди ногай халкын, онынъ маданиятын, оны янландырув эм таралтув уьшин баьри куьшин салатаган эди, – деп айтты ол.
Атшабыстынъ катнасувшылары доьрт дистанция бойынша сынастылар. Атшабыста 30 атлар катнастылар – атлар спортынынъ эм аьдетлерининъ шынты байрамы. Атшабыста енъуьвшилер белгилендилер: таза йыныслы атлардынъ 1800 метрге ювырувында биринши орынды Куьнбатар авылыннан Аскер Аджигеримов Касмея аты ман алды. Ерли йыныслы атлардынъ 1600 метрге ювырувында ийги деп Таьтли-Булак авылыннан Каирбек Аракбаев Абрек аты ман белгиленди, уьш йылдан йогары ярты йыныслы атлардынъ
3200 метрге ювырувында биринши Червленные-Буруны авылыннан Арслан Аджиньязов Красавчик аты ман болды. Уьш яска дейим ярты йыныслы атлардынъ 1600 метрге
ювырувында ийги деген Асанали Сангишиев Бурак аты ман эди. Енъуьвшилерге баргылар тапшырылды. Меккага хаджга барувга сертификатты Аскер Аджигеримов утты.
Арслан Аджиньязовка миллет саз алаты – домбрады тапшырдылар.
Энъ де яс катнасувшысы Фазиль Эсенгельдиевке де домбрады Эдиге Куруптурсунов савгалады. Баьри катнасувшылар медальлер мен, кубоклар ман эм акшалы баргылар
ман савгаландылар. Шара концерт программасы ман тамамланды.