Магомед Рамазанов – асылы ман Дагестаннынъ Цунтинский районынынъ Бежта авылыннан. Республика Оькиметининъ Председатели этилинип ол элимиздинъ йогары етекшилев ягыннан сеним этуьви мен беркитилди. Дагестан – Магомед Рамазановтынъ киши Тувган ери, эм, РФ Президенти белгилегенлей, онынъ республика
ерин, мундагы аьллерди ийги билгени аьлиги туьзилген енъил тувыл заманда бек керегеек.
Ога дейим Магомед Рамазанов Москвада ФСБ тармагында куллык эткен, а оннан сонъ президенттинъ толы ыхтыярлы ваькили болып Дальневосточный эм Сырт-Кавказ федераллык округларында кыйын салган.
Эл басшысынынъ толы ыхтыярлы ваькили – ол округта регионнынъ исин онълайтаган федераллык чиновниктинъ ис орыны.
Магомед Рамазанов – Дагестанга таныс аьдем тувыл, ама халкта оннан айырым куьтуьвлер бар. Боьтен де ол республика ерин сув алган ман байланыслы баьле-казасынынъ
калдыкларын тайдырув бойынша аьрекетлевди онълавда оьзининъ кеспилик белгилерин коьрсетти. Бу зат онынъ туьзилген авыр аьллерди туьзетип болаягын шайытлайды.
Дагестан – экономика, миллет соравы эм инвестициялар киритилуьв ягыннан айырым баскалыклары бар регион, сонынъ уьшин мунда етекшилев ис орынында куллык этуьв сулыбы бар, кескинли карарларды кабыл этип, ямагат кызыксынувларын эсапка алып, регион яшавшылары ман биргелесте пайдалы аьрекетлевди эм ерли маьселелерди шешуьвди бажарып билетаган аьдем керек.
Буьгуьнлерде Дагестан Республикасынынъ йогары власть ис орынларында оьз борышларын ийги билетаган, законга негизленип аьрекет этетаган республика етекшилери –
ДР Халк Йыйынынынъ Председатели Заур Аскендеров эм ДР Аькимбасынынъ исин кесек заманга юритуьвши этилинип беркитилген Федор Щукин мен бирге Магомед Рамазановтынъ ДР Оькиметининъ Председатели ис орынында аьрекети республика яшавшыларынынъ яшав дережесин арттырувга каратылаягында шекленмеймен. Республикамыз оьрленуьвге кенъ амаллар ашылады.
Любовь Уразаева.