ДР-нынъ коьлик эм йол хозяйство министрининъ тапшырмасы бойынша Ногай район еринде йогары республикалык дережели делегациясы болып кетти: республикадынъ
коьлик эм йол хозяйство министрининъ биринши орынбасары Темирлан Аджиев, «Дагавтодор» ГКУ етекшиси Рустам Закариев, онынъ орынбасары Замир Умаханов эм
«РСУ» АО етекшиси Гимбат Гимбатов.
Сол делегациядынъ бизге келуьвининъ бас мырады – алдын ерли властинде тынышсызланув тувдыратаган республикалык маьнели автойолларды коьзлери мен коьруьв.
Конакларды «Ногайский район» МР администрациясынынъ аькимбасы Джамалутдин Эсиргепов, «Ногайский район» МР Депутатлар Йыйынынынъ председатели Алибек Менласанов, район аькимбасынынъ орынбасары Рашид Шангереев, «Ногайское РСУ» АО филиалынынъ директоры Джамбулат Караев, солай ок авыл поселениелер аькимбаслары эм ерли организациялар ваькиллери хош коьрип йолыктылар.
Ис куьни район администрациясында кенъес озгарувдан басланды. Джамалутдин Эсиргеповтынъ басшылыгы астында бас орында турган маьселелер ортага салынып ойласылды: йоллардынъ энъ маьселели участоклары айырылып белгиленди, ызгы айларда яшавшылардан йоллар аьли мен байланыста шагынувлар статистикасы каралды, йолларды ремонтлав уьшин баслапкы этилинмеге керекли ислер кадерине эм ремонтлавга шыгарылаяк карыжга баа берилди. Капиталлык ярастырув ислер озгарувда туьрли ведомстволардынъ биргелес аьрекетлев соравларына айырым эс каратылды. Кенъестен сонъ делегация районымыздынъ авыллары – Карасу, Кумли, Червленные Буруны, Бораншы, Карагас, Уьйсалган эм Куьнбатарды айланып шыкты. Аьр авылда делегация ерли яшавшылар ман йолыгысты, йоллардынъ аьллери акында оларды эситуьв уьшин.
Район администрациясынынъ пресс-службасы.