Дагестан Республикасынынъ аькимбасынынъ куллыгын кесек заманга юритуьвши Федор Щукин Информация эм баспа агентствосын, солай ок Предпринимательство эм инвестициялар бойынша агентствосын тайдырув акында указга кол басты. Олардынъ борышлары эки министерстволарга берилген.
Документ Дагестаннынъ правовой информациясынынъ официаллык порталында баспаланган. Соны ман, республикада толтырувшы власть органларынынъ янъыртылган структурасы токтастырылган.
2026-ншы йылдынъ 22-нши май куьниннен алып Дагестанда Цифровой оьрленуьв, информация эм баспа министерствосы аьрекет этеди. Ол регион етекшисининъ республика оькиметининъ структурасын туьрлентуьв сырагысында туьзилген. Янъы структурага тайдырылган Информация эм баспа агентствосынынъ ис борышлары коьширилген. Министерстводынъ борышлары арасында – цифровой оьрленуьв, патшалык эм муниципаллык буйымларын цифровизациялав тармагында патшалык политикасын яшавга
шыгарув, информационлык кавыфсызлыкты канагатлав, солай ок медиа-тармагы ман эм баспалав аьрекети мен басшылав.
Соны ман, эндигиси ДР-нынъ Цифровой оьрленуьв, информация эм баспа министерствосына коьлемлик информация амаллары ман биргелес аьрекет этуьв соравлары коьшеди.
ДР-нынъ Экономика эм территориаллык оьрленуьв министерствосы Предпринимательство эм инвестициялар бойынша агентствосын оьз тергеви астына алады.
Дагестан Республика Оькиметине бир ай болжалында реформа ман байланыслы уйгынлав, финанс, муьлк эм баска соравларды шешуьв, солай ок тийисли законодательствога керекли туьрленислер киргистуьв тапшырмасы берилген.
Дагестаннынъ толтырувшы власть органларынынъ янъыртылган структурасына, айырым айтканда, 20 министерстволар, бес комитетлер эм баска власть органлары киреди.