«Халкымыздынъ – келеектегиси онынъ тилинде» сол соьздинъ бек уьйкен эм терен маьнеси бар. Халк – халк деп саналады, эгер онынъ ана тили, маданияты, санияты бар болса. А сол затлардынъ болувына биз оьзимиз, аьр кайсы миллет ваькили, оьзи себеп этеди.
Аьлиги заман. Булай карасак, ийги яшав бардырмага баьри онъайлыклар да бар, ама тилимизди йойытув маьселемиз де йок тувыл.
Ногай тилинде баспаланатаган газета, журналлар сол ниет пен тилди саклав уьшин баьри куьшин де салады. Оларды саклавга да амаллар керек болады, олай дегеним, баспа изданиелерге язылув заманы (подписка) келгенде кыйналамыз, ама бизди колтыклайтаганлар саны да аз тувыл. Буьгуьн мен оьзимнинъ разылыгымды оларга билдирмеге суьемен – Ханты-Мансийский автономлы округында ис аьрекет бардырып, элимиздинъ туьрли тармакларында оьрленуьвге куьш салатаган ердеслеримиз Тимур
Аракчиевке, Темирлан Шандиевке эм коьплеген баскаларга. Бу йигитлеримиздинъ куьш салувы ман ногай тилимизде «Лашын» журналымыз сырт якларга да етип, балаларды суьйинтеди, олардынъ уьстинликлери акында да язамыз. Балаларды кувандырув деген тувыл ма саваплык… Журналымызга язылув юргенде салдарлы коьмекти Ногай районымыздынъ ис коллективлери де этедилер, аьр бирисине муьсируьвли савболсынымызды билдиремиз, эткен ийгилигинъиз, тилди саклавга косканынъыз, мынъ кабатлы
яхшылык болып кайтсын. Тилимиз болса, биз Ногай атлы миллет те болармыз. Зухра Култаева, «Лашын» балалар уьшин журналынынъ куллыкшысы.