Бизим дуныямыз ийги аьдемлердинъ юрек йылувлыгы эм юмартлыгы ман оьмирли деп айтпага суьемен. Меним унык кызым Миланады каты авырувы ман Кисловодск каладан
Терекли-Мектебке, Ногай район орталык больницасына аькелген эдилер. Сонда бизди балалар боьлигининъ етекшиси, сулыплы эм абырайлы врач-педиатр Тотана Абуевна Шомарова яны авырып, хош коьрип йолыкты. Ол оьз ягыннан тийисли анализлерди бердиртип, баьри керекли тергевлерди де оьткерип, унык кызыма тийисли эмлев
йорыгын язып, колыннан келген уьйкен коьмегин этти. Балалар боьлигинде Милана эки юма ятып эмленди. Сол заман кесегинде Тотана Абуевна куьн сайын ога келип, оны тергеп, аьлин билип турды.
Бу врач Ногай ЦРБ коллективинде оьзининъ куллыгына мукаятлыгы, балаларга суьйимлиги, уьйкен аьдемшилиги мен белгили. Ол 1983-нши йылда Дагестан медицина институтынынъ педиатрия боьлигин окып кутарган. 1983-84-нши йылларда РКДБ негизинде педиатрия бойынша интернатурады битирген. Соннан бери ол бир
уьзилгисиз 40 йылдан артык заман Ногай ЦРБнынъ балалар боьлигин басшылап келеди. Тотана Абуевнага 2004-нши йылда йогары категориялы специалист-педиатр ис
дережеси берилген. Ол аьр заман да оьзининъ кеспи аьзирлигин арттырув уьстинде куллык этеди.
Сондай Тотана Абуевнадынъ эм балалар боьлигининъ медперсоналынынъ эм техперсоналынынъ ийги каравы ман унык кызым аьруьв болды. Буьгуьнлерде мен Тотана Шомаровадынъ коллективине, онынъ медсестралары Марина Аджиковага, Ембийке Садуевага, Фатима Батыровага, Назира Аблезовага, Камилия Янгишиевага, Земфира Мамутовага, баьри де мундагы санитаркаларга юрек разылыгымды билдиремен.
Бу зат пан байланыста мен Ногай ЦРБ бас врачы Фаризат Межитовага да мунда билимли ис суьер бир ниетли коллектив эм авырувлыларга эмленуьвге баьри де керекли аьллерди туьзгени, ЦРБ азбарында сондай да ыспайы бав эккени уьшин уьйкен разылык соьзлеримди айтаман.
Сондай ийги соьзлерге Ногай район поликлиникасынынъ заведующийи Мадина Арсланова да тийисли, ол аьр заман да мен мунда келсем, бир де йигеримди йыкпай, колдан келген ярдамын аямайды.
Олар ман бирге бу ерде участок педиатры Альмира Тангатаровага, участок терапевтимиз Сафира Аджиевага да разылыгымды каратаман. Олар ислерине бек, оьзлерининъ врач
антына алал специалистлер. Врач-онколог Маржанат Теминова меним аьптем Насевге ийги карав береди.
Солай ок врач-терапевт Кумисхан Сабутова, врачпсихиатр Юпархан Нурлубаева, врач-невролог Анжела Отемова акында да коьп йылы соьзлер айтпага боламан. Айтылган врачлардынъ, медиклердинъ баьрисине де, сав Ногай ЦРБ ис коллективине берк ден савлыкты, алдыда уьйкен ис уьстинликлерди эм наьсипти йорайман. Алла сизге эм эткен кыйынынъызга разы болсын!
С.Аджикова, Терекли-Мектеб авыл яшавшысы.
Суьвретте: Ногай ЦРБ-нынъ балалар боьлигининъ заведующийи Т.Шомарова ис йолдасларынынъ бир куьби мен.
