Янъыларда Куьнбатар авылында айырым баскалыгы эм уьйкен маьнелиги болган оьзгерис – Совет Союзынынъ Баьтири Халмурза Кумуков атындагы сквер ашылувына
багысланып, шатлыклы шара болып оьтти.
Данъклы Баьтирдинъ аты баьри несиллерге белгили: 1943-нши йылдынъ 23-нши декабринде Халмурза Сахатгереевич Кумуков, Александр Матросовтынъ йигитлигин
кайтаралаган, яв пулеметынынъ авызын оьз кевдеси мен ябып.
Шатлыклы шарада Баьтирдинъ ювыклары эм кардаштувганлары – Н.А.Кумуков, Б.М.Кумуков, Б.А.Кумуков, М.Б.Кумратова, КарашайШеркеш Республикасынынъ
Ногай районынынъ ваькиллери, Куьнбатар авыл аькимбасы З.Ф.Яриков, Маданият уьйининъ директоры С.Э.Мусаева, китапхана заведующийи С.М.Шабазгереева, Куьнбатар авыл мектебининъ ваькиллери, Олимпиялык чемпион Альберт Батыргазиев, Москва каласындагы Ногай общинасынынъ ваькиллери – Азиз Аджиманбетов эм Залимхан
Койлакаев ортакшылык эттилер. Митингте согыс эм ис ветеранлар Советининъ председатели М.М.Куванаев, район билимлендируьв боьлигининъ начальниги А.З.Межитов,
Куьнбатар авыл мектебининъ тербиялав иси бойынша завучы К.М.Кокеева шыгып соьйледилер. 5-нши «а» класс окувшысы Амина Шабазгереева Халмурза Кумуковка
багысланган ятлавды яттан окыды.
Кумуковлар тукымынынъ ювыклары митинг катнасувшыларына йылы соьзлери уьшин разылыкларын билдирдилер, авыл яшавшылары сондай аьдемлерди эсте саклаганы эм атын оьмирлететаганы олардынъ аьелине уьйкен оьктемлик эм суьйиниш экенин белгилеп.
Сквердинъ ашылувы Куьнбатар авыл яшавшылары уьшин маьнели оьзгерис эм Баьтирдинъ йигитлиги акында эсти саклавдынъ, тарихке сый этуьвдинъ эм оьсип келеяткан
несиллерде патриотизм сезимлерин тербиялавдынъ белгиси болды.