Йыл сайын тамбыз айынынъ 6-ншы куьнинде элимизде Пушкиннинъ куьни белгиленеди, бу байрам бизге Орыс тилининъ куьни деп те белгили. Уллы орыс шаири, драматург эм прозаик Александр Сергеевич Пушкиннинъ адабиат яратувшылыгы бек баалы. Олар ман биз кишкей заманда танысамыз, эм савлай яшавымыз бойынша бизи мен сыхырлы эртегилери, ятлавлары, поэмалары, каьмбил, терен ойлы хабарлары эм повестьлери каладылар.
Уллы орыс шаирининъ тувган куьни алдында Терекли-Мектеб авылындагы балалар китапханасында Пушкиннинъ эртегилери бойынша викторина озгарылды. Шарада А-Х.Джанибеков атындагы мектебинде яз шагында аьрекетлеген «Летняя карусель» лагерининъ «Торнадо» отрядынынъ балалары (вожатыйлары А.Суюндикова) катнастылар. Кызыклы эм пайдалы шарады балалар китапхана етекшиси Зарема Джумалиева шаирдинъ аьели эм шыгармалары акында хабары ман баслады. Бу тек хабар тувыл эди, йыйылганлар соравлар да бердилер, ойлары ман да боьлистилер.
Сонъ окувшылар китапхана куллыкшысы Фаризат Эспергенова ман Александр Пушкиннинъ эртегилер дуныясы бойынша сыхырлы элгезерлик эттилер, мунда оларга кызыклы борышлар берилди. Балалар уллы шаирдинъ ятлавларыннан, поэмаларыннан уьзиклерди эслерине алдылар, шаирдинъ белгили сыдыраларын тынълап, кайсы эртегидинъ
баьтири экенин шештилер.
Сонъ балаларга конакка «Билимли Мысык та» келди, оны ман бирге балалардынъ элгезерлигининъ аьлеметлиги боьтен де оьсти. Мысык балаларды царь Салтанга, балык ыслайтаган атайга, алтын балыкка аькетти.
Шара сонъында викторина катнасувшылары «Уллы Россиядынъ уллы шаири» деген ярасык атлы китап выставкасы ман пайдалынып, тагы да коьп янъыды билдилер. Аваслыгы болган балалар Пушкиннинъ «Узник», «Зимнее утро», «Няне» эм баска ятлавларын яттан айттылар. Бу куьнги викторинадынъ кызыклыгы ман коьнъилленген балалар уьйлерине китапханадан окымага А.Пушкиннинъ китаплерин аькеттилер. Бу куьн зейинли орыс шаирдинъ яратувшылыгын баалаган балалар уьшин шынты байрамга айланды эм балалардынъ коьнъиллерин коьтерип калмай, билимлерин оьстирмеге де себеплигин этти.
Нурият Кожаева.
Суьвретте: шарадан коьринис.
