Аьр кайсы савга да ис тамамы бойынша казанылган етимислери уьшин бериледи. Тек янъыларда «Дагестан» памитшалыктелерадиокомпаниясынынъ ногай боьлигининъ етекшиси, ДР ат казанган маданият куллыкшысы, Россия Журналистлер союзынынъ агзасы Зафира Бекболат кызы Магомедова Дагестан Республикасынынъ Ямагат палатасынынъ атыннан Разылык хатка тийисли болды.
Эсинъизге салып озайым, Зафира Бекболат кызы Магомедова коьп йыллар узагында оьзининъ ис аьрекетин ногайымыздынъ маданиятын оьрлендируьвге, тил байлыгын оьстируьвге, ана тилимиздинъ сакланувына куьш салып келеди. Онынъ тавысы бизим ногай халкымыздынъ радио тынълавшыларына,
телевидениесин каравшыларына ийги таныс болады. Ол юма сайын радио эм телевидениеде ногайымыздынъ яслары эм кызлары, аьлимлери эм адабият аьрекетшилери акында, республикамыздынъ ямагат политикалык аьрекети бойынша болган янъылыклары ман боьлисип турады.
Бу куьнги савга онынъ коьпйыллык аьрекети баалы эм керекли экенин белгилейди.
Савгалавга багысланган шара бас каламыз Махачкаладагы Дослык уьйинде оьткерилди.
Мунда Дагестан Республикасынынъ Ямагат палатасынынъ агзасы, Ногай районнынъ хатынкызлар советининъ председатели Асият Манкаева да ортакшылык этти эм район администрациясыатыннан Зафира  Магомедова ды кутлады, эндиден армаганда да яратувшылык йолында йогары етимислерди йорады.
«Шоьл тавысы» республикалык ямагат политикалык газетасынынъ редакция куллыкшылары, ис йолдасымызды, «Дагестан» ГТРК журналисти Зафира Магомедовады бу куьн алган савгасы ман кутлаймыз, келеекте ана тилимизди саклавда эм таралтувда оьзининъ бар болган сулыбын салып аьрекет этеегине сенемиз.
Алдыда аьли де етимислер коьп болсын!
Г.Курганова.
Суьвретте: З.Магомедова.