Россия Президенти Владимир Путин Каспийск каласыннан Шамиль Устарбековка Ортакроссиялык халк фронтынынъ кубогын тапшырды.
Ол республикамыз ерин куьшли ямгырлардан сонъ сув алган баьле-каза куьнлеринде 23 аьдемди оьлимнен куткарган – ызлы-ызыннан буздай сувык сувга суьнъгип кирип, кевдесине салып, кыскаяклыларды эм балаларды шыгарып, ютылувдан аман акалган. Ювыклары Шамильди уьш куьн узагында излегенлер,
а ол, уьйге бармай эм бир аз заман уйкыга коьмилуьв мен ял алып, аьдемлерди куткарув ман каьрлеген. «Бираз-бираз корктым», – деди Шаьмиль, уяла берип, ама кайтакайта сувга кирген, неге десе ол баскаша этип болмаган.
Дагестан аькимбасынынъ куллыгын кесек заманга толтырувшы белгилегенлей, Шамиль Устарбековтынъ йигитлиги энъ йогары дережеде белгиленди.
– Шамильдинъ йигитлиги энъ йогары патшалык дережеде белгиленгени мен оьктемсиймен. Эм соны ман онынъ тек байыр йигитлиги тувыл, аьр дагестанлыда генетикалык дережеде салынып, дайым да коьмек этуьвге аьзирлиги, йигитлик, йигерлик, коркынышсызлык белгилери барлыгы белгиленди.
Ясуьйкенди оьрметлев эм осалларды коршалав – бизим тав ерининъ яшавшыларынынъ дайымлык эм берк кодекси. Президент буьгуьн аян дурыс белгиледи: коркув деген аьдемде болатаган сезим, ама бизим куьшимиз – бу сынавдан оьтуьв эм алдыга барув.
Ол – буьгуьн биз алдышылыкта аьр куьн коьретаган йигерлик. Согыс спецоперация еринде бизим эр йигитлер – сондай каты эм куьшли касиетли дагестанлылар. Оьзлерин аямай, олар урысларда йигитлерше катнасадылар, йолдасларын оьз кевдеси мен ябадылар эм яраланганларды шыгарадылар атыслар юрген майданлардан. Дагестан дайым да баьтирлер ери болган эм болады. Эм Шамиль – олардынъ бириси. Савбол йигитлигинъ уьшин, Шамиль. Республикамыз сени мен оьктемсийди, – деди Федор Щукин.