Янъыларда Дагестан Республика Аькимбасынынъ куллыгын кесек заманга толтырувшы Федор Щукин Ясуьйкенлер совети мен йолыгысты эм онынъ агзаларына республика онъайлыгы уьшин коьпйыллык кыйын салганы эм каты гражданлык позициясы барлыгы уьшин разылыгын билдирди.
Республика етекшиси дагестан халкынынъ бирлигин саклавда ясуьйкенлер несили уьйкен орын тутатаганын белгиледи. Федор Щукиннинъ соьзлерине коьре, ясуьйкенлер дайым да маданият асабалыкты, коьп оьмирлик ийги аьдетлердинъ, анъ-акыл баалыклардынъ, эдап йорыклардынъ сенимли саклавшылары болганлар эм боладылар. Регион етекшиси республикага тарих сайлавын этпеге керегин эске салды: бир дережели системага коьшпеге яде эки дережелиди сакламага. Онынъ соьзлери мен, бу карар территориялар
ман басшылавга тувра себеплик этеек эм республикадынъ аьр яшавшысына пайдасы тиеек.
– Ортага салынып ойласылмай, бир карарлар да кабыл этилип алынмаяк. Аьр абытты биз дагестанлылардынъ ой-токтасларын эсапка алув ман этеекпиз.
Эм бу исте мага бек маьнели бизим ясуьйкенлердинъ тавысы. Олар – онлаган йыллар районлар эм калалар ман басшылаган, муниципаллык тармагынынынъ аьр затын ишиннен билетаган эм яшавшылар арасында уьйкен сый-оьрмет пен пайдаланатаган аьдемлер. Олар болмаса, кимге бааламага керек ондай реформаларды», – деп билдирди оьз ойын Федор Щукин.
– Мага бек маьнели бас тармаклар бойынша (савлык саклав эм промышленностьтен алып авыл хозяйство эм маданиятка дейим) ясуьйкенлердинъ ой-токтасларын билмеге. Булар – аьр дагестанлыды тынышсызландыратаган темалар. Совет агзалары арасында – илмилер докторлары, ат казанган врачлар, окытувшылар, алдынгысы министрлер, районлар аькимбаслары, халк артистлери эм язувшылар. Олардынъ аьриси – оьз аьрекетининъ устасы. Онйыллык патшалык эм яшав сулыбы барлар.
Ясуьйкенлерге сый этуьв – бизим ямагатымыздынъ негизи, эм мен уьшин Ясуьйкенлер совети – сый ман пайдаланатаган экспертлик майдан. Дагестаннынъ оьрленуьви бойынша кайдай ды болсын стратегиялык караларды кабыл этип ала берип, мен бизим аксакаллылардынъ ойларына эм маслагатларына таянаякпан, – деди республика етекшиси.
Йолыгыста коьтерилген баславлар эм соравлар бойынша туьрли министерстволарга тапшырмалар берилди.