Быйылгы аслык йыюв куллыклары районы еринде алдынгы йыллардан бираз кеш басландылар. Сол зат июнь айында явган ямгырлардан себеп, эгин кырларда дымкыллыктынъ нормадан артувы ман байланыслы болган.
Буьгуьнлерде район бойынша онъыс йыюв ислери бардырылып турадылар.
Быйыл район ерлеринде баьриси куьзлик бийдай – 10003 гектарда, язлык арпа – 3655 гектарда, сулы – 1000 гектарда шашылганы эсапка алынган. Солар ман бирге район бойынша 130,7 гектарда ералма, 514,55 гектарда – ясылшалар, 2007 гектарда – бакша культуралары, 1550 гектарда – коьпйыллык оьленлер эм 5057 гектарда – бирйыллык оьленлер де шашылып оьстирилген.
Аьлиги заманларда баьриси район еринде шашылган 10003 гектардагы куьзлик бийдайдынъ 3500 гектарындагы аслыгы йыйылганы акында билдиредилер Ногай район Авыл хозяйство управлениесинде. Аьр бир гектардан район бойынша орта эсапта 35 центнер бийдай болдырылган эм баьриси бу куьнлерге 12250 тонна онъыс йыйылып алынган.
Соны ман бирге район эгин кырларында язлык арпа еми 2400 гектардан (орташа бир гектардан 30 центнер) 7200 тонна йыйылган. Сулы культурасы да 400 гектардан (бир гектардан 30 центнер) 1200 тонна
онъыс болдырылган.
Бу куьнлерде район ызанларында бийдай йыюв куллыкларында 12 комбайнлар ислеп турадылар.
Сол ок заман келеяткан кыс айларына байыр малларга деп авыл фермерлери эм арендаторлары аьли уьшин 35000 тонна катлыклы пишен-ем де аьзир эткенлер.
Язгы кыр куллыкларын оьткеруьв бойынша ягарлык-майлав материаллары 100 процентке етиседи, олай дегени, бензин, солярка, май ман техника толы кебинде канагатланган.
Аслык йыюв куллыклары эндиги де юритиледилер.
М.Юнусов.
Суьвретте: эгин кырларда аслык йыюв ислери аьсеринде.