Куьн сайын фронттынъ туьрли кесеклеринде, боьликлеринде аьскершилеримиз йигитликлер коьрсетедилер. Оларга енъмеге эм енъуьвши болмага бек маьнели. «Йигитлеримиз Россиядынъ кавыфсызлыгын канагатлавда маьнели борышын толтырадылар, элбетте, эли олардынъ акында билмеге эм айтпага тийисли. Олардынъ акында йыр да шыгарып, ятлав да язып, эстелик те курмага тийисли деп ойлайман», – деген Россия Президенти Владимир Путин оьзининъ соьйлевинде.
Сондай йигитлердинъ бириси – Ришад Генадиевич Сейтасанов. Ол парахатлы аьдем, касындагыдынъ акында каьр шеккен увыл, ян косак, ата эди. Ол баьри яшав кыйынлыкларды, авырлыкларды да йигитлерше оьтип,
кардаш-тувганларды, ювыкларды, досларды юмарт соьзи мен эм иси мен коьтергишлеп келген.
Тоьгеректегилер ога, онынъ ашыклыгын эм танълыгын сезип, тартылганлар.
Ришад 1994-нши йылдынъ тамбыз айынынъ 26-ншы куьнинде Нефтекум районынынъ Кара-Тоьбе авылында тувып оьскен.
Мектебте ол уьлгили эм танъ окувшылардынъ бириси эди.
Окувда эм спортта бийик етимислерге тийисли болып келген. Хасавюрт педколледжининъ Терекли Мектебтеги филиалына туьсип, оны етимисли тамамлады. Коьп заман кетпей, ол Невинномысск каласындагы патшалык гуманитарлыктехникалык институтына заочно туьсип окыды. Колледжден сонъ, Ришад Нефтекумск каласындагы 1-нши номерли орта мектебинде педагог болып аьрекетледи. Ама ога коьп
заман окытувшы кесписи бойынша куллык этпеге бакты буйырмады. 2020-ншы йыл оны эр борышын толтырмага аьскер сырасына шакырдылар. Аьскер сырасында етимисли службасы уьшин яска Воронеж каласында Уллы Аталык согысында Енъуьвининъ 75 йыллыгына оьткен парадында ортакшылап, медаль де берилген. Эр борышын толтырып кайтканнан сонъ, ол окытувшылык аьрекетин Буденновск каласынынъ 5-нши номерли мектебинде баслады. 2022-нши йылдынъ басында Элимиздинъ бас каласында от туьсуьвге карсы службасынынъ аьрекетшиси болып каьрледи.
Элине авыр заманлар тувганда, ердесимиз бириншилер сырасында неонацистлерден ерин коршаламага шыкты. Ришад 2022-нши йылдынъ казан айында мобилизация бойынша кетип, СВО ерине Купянск кала туьбинде явды каты согып келди. Ис аьрекетин ол СВО ерине мотострелковый батальонынынъ канагатлав взводында техника ягыннан буйымларды толтырув боьлигинде толтырган. Службасы етимисли барувы ман байланыста аьскершидинъ етекшилеви атыннан онынъ ата-анасы Генадий Сейфетдиновичке эм Маржан Алибековнага Разылык хаты да йиберилди. Хаттынъ ишинде ястынъ ата-анасына шынты патриотты, элимиздинъ йигерли коршалавшысы – киши сержант Ришад Сейтасановты тийисли тербиялаганлары уьшин шынты разылык соьзлери билдирилген эди. Ама йигерли ястынъ оьмири, оькинишке, кыска болды. Ол элимиздинъ тарихинде йигитлиги дайымга язылган йигитлердинъ бириси болады. 2025-нши
йылдынъ канътар айынынъ 23-нши куьнинде Ришадтынъ СВО барысында согыс борышын толтырувда яны курман болды. Согыс майданда коьрсеткен йигитлиги, коркынышсызлыгы уьшин ол (оьлгеннен сонъ) «Йигитлик орденине» тийисли этилди. Йогары патшалык савгасын йигиттинъ ата-анасына тапшырдылар.
Ришадтынъ кан тамырында енъуьвшилер каны бар. Ол – Уллы Аталык согысынынъ ветераны, сержант-пулеметчик Магомед Алимовтынь немереси. Сол несиллердинъ байланыс йиби Ришадка йол коьрсеткиш болды.
Йигит аьелине тирев, сеним, суьйикли увыл эди. Онынъ кардаш-ювыклары заман юрек яраларын эмлемейди дейдилер. Онынъ сеси занъырап шыккан уьйи босады.
Онда онынъ йылы куьлкиси, йылы хабарласувы, каьр шегуьви, коьтергишлеви етпейди. Ама, сол йойымга да карамай, олардынъ юреклерин Ришадтынъ аьдемшилик сапатлары болганы уьйкен оьктемлик толтырады. Ол ызгы тынысына дейим антына алал болган шынты патриот эди.
Баьтир акында эстелик дайым яшасын, яс несил йигитлерин танысын деген ниет пен, Ришадтынъ эстелигине парта ашылды. Шатлыклы ашылув шаралары онынъ тувган КараТоьбе авыл, оннан сонъ Ногай районынынъ Джанибеков атындагы орта мектеблеринде оздылар.
Эндиги аьр бир окувшыдынъ сол партага олтырганда, таза коькти, окымага, мырат этпеге, ярык келеектегиди туьзбеге Ришад Сейтасанов оьз яшавын бергени эсинде тураяк. Йигерли ердесимиздинъ аты юреклерде дайымга яшар.
Г.Нурдинова.
Суьвретте: Ришад Сейтасанов.