Аьел, суьйим эм алаллык куьнине багысланып, район орталык китапханасында СВО катнасувшысы болган, бирге ярты оьмирден артык заман яшаган эм насихатшы аьеллерге аьлемет эм йылы байрам ДР Ямагат палатасынынъ агзасы, район Хатын-кызлар советининъ председатели Асият Манкаевадынъ баславы ман уйгынланды. Мунда бирге коьпйыллар яшаган, берк аьел курган, элге пайдалы балалар тербиялаган эм ясларга коьрим болган доьрт ян косаклар: Арсланбий эм Зарифат Кунтугановлар, Динибек эм Авархан Шамсутдиновлар, Солтанмурат эм Зульфия Караяновлар, Асанбий эм Гульмира Тангаевлер оьрметлендилер. Шара басланганша дейим де, китапханады бир аьлемет алаллык эм шынтылык аьл бийлеген эди, сога аьел акында рахатлы йыр, берекетли сыпырадынъ уьстиндеги гуьл байламлар, тоьгеректеги – таза суьйимнинъ белгиси – шобан
(ромашка) шешекейлери демевлик эткен болар.
Йолыгыста Согыс, ис, Савытлы куьшлер эм ыхтыяр саклавшы органларынынъ ветеранлар советининъ председатели Акманбет
Сангишиев, Ногай район Ямагат палатасынынъ председатели Эльмурза Саитов, Ясуьйкенлер советининъ председатели Шатемир
Мунгишиев, Ногай район аькимбасынынъ орынбасары Мурат Шадиев, бу шарадынъ озгарылувында коьп куьш салган Асият Манкаева, солай ок китапхана етекшиси Сабират Абубекерова, Терекли-Мектеб авыл администрация специалисти Аида Салимгереева ортакшылык эттилер.
Шарады китапхана куллыкшысы Арина Якубова ашып юритти. Бу куьн байрам иелерине коьп йылы соьзлери каратылды, йырлар багысланды, савкатлар эм баргылар да тапшырылды. ДР Ямагат палатасынынъ Разылык хаты ман Шамсудиновлардынъ аьели, Арсланбий Кунтувганов, Сабират Абубекерова белгилендилер, баска аьеллерге Терекли-Мектеб авыл администрациясыннан эм район Хатын-кызлар советиннен Сый грамоталар берилди.
Йыйылганлар бу аьеллерге сукланып карайдылар, аьр бирев белкиси, мендей болып, оьзининъ ата-анасын, тувган аьелин эсине алган болар, аьр бир аьелдинъ оьз бактысы бар. Бу куьн хатынлар коьзинде коьзяслар да сезилмей калмады, оларды шарадынъ
ийгилиги ме, бийлеген ойлар ма яде болса суьйиниш шакырды ма экен? Аьр кимде оьз себеби. Тек бек авыр болды мага эр кисиде коьзясларды тыгырткан, баласын йойытув ман байланыслы, бир де битпес юрек ярасынынъ сызлавын юзинде сезгенде.
Шамсутдиновлардынъ аьели уьш эр бала тербиялаган эм Карл Маркс атындагы совхозын социаллык яктан оьрлендируьвге уьйкен уьлис коскан.
2022-нши йыл олардынъ увылы Алибек толы болмаган мобилизация бойынша СВО-га шакыртылган эм Запорожье областине йиберилген.
Эрклиги уьшин ога «За воинскую доблесть» 2-нши дережели медали тапшырылган. 21-нши ноябрьде ол йигитше ян берген. Алибек оьлгеннен сонъ, Эрклик медалине тийисли болган. Шамсудиновлардынъ аьели аьли СВО катнасувшыларына гуманитарлык юклер йыйнавда белсенли катнасадылар.
Кунтугановлардынъ аьели оьз яшав йолын – 50 йылдан артык заманын бирге оьткенлер. Олар аьлемет яшав яшаганлар, дайым
бир-бирине таянганлар, тийисли увыл эм кыз оьстиргенлер, аьли 6 уныгына суьйинедилер.
Арсланбий Сейдахметович «Союз чернобыльцев России» Ортакроссиялык ямагат организациясынынъ ДР-нынъ Ногай районындагы боьлигининъ председатели, район Ямагат палатасынынъ, Согыс, ис, Савытлы куьшлер эм ыхтыяр саклав органларынынъ ветеранлар советининъ агзасы болады. Ол тийисли тыншаювда болса да, яслар ман уьйкен аьскерпатриотлык куллык юритеди, шаралар уйгынлайды. Чернобыльда болган баьле-казадынъ калдыкларын тайдырувында катнасканлардынъ
йигитлигин оьрметлев бойынша уьйкен куллык этеди.
Тангаевлердинъ аьели 30 йыл артта курылган. Асанбий Бекбердиевич – согыс оьзгерислерининъ ветераны. Хатыны Гульмира ман бирге 4 увыл оьстирген, аьли олардынъ экевлери согыс спецоперация барысында борышлар толтырадылар.
Зульфия Караянова районымыздынъ, элимиздинъ келеектегиси – яс несилди тербиялав бойынша исти юритеди. Солтанмурат Караянов –Халк маданият орталыгынынъ етекшиси. Караяновлардынъ аьели берк эм татым, олардынъ 3 кызы эм бир увылы бар. Кызлары элимиздинъ алдышы йогары окув ошакларында билим аладылар, увылы – шахматист. Кызлары заманында йырлаганлар эм республикамыздынъ эм районымыздынъ туьрли майданларына шыкканлар.
Бу куьнги шарада Разылык хат тапшырылган Сабират Абубекерова акында да коьп ийги соьзлер айтылды. Ол яшавшылардынъ
социаллык-маданият ярыкландырув аьрекетине, ясларды эдаплык яктан тербиялавга, тарих эстелигин саклавга уьйкен уьлис коскан.
Китапханада бу куьн озган йолыгыс мунда аьр бир байрамга багысланып йогары дережеде оьтетаган шаралардынъ санын тагы да оьстирди.
Нурият Кожаева.
Суьвретте: йолыгыс катнасувшылары.