Шарады ашаятып, палатадынъ председатели Эльмурза Саитов Ногай районынынъ Хатын-кызлар советининъ председатели Асият Манкаева бир неше йылдан бери солай ок Дагестан Республикасынынъ Ямагат палатасында бизим районнынъ ваькили болып куллык эткенин айтты. Быйыл онынъ сонда агза болувынынъ болжалы битип турганы ман байланыста район
Ямагат палатасы оны 2023- 2026-ншы йыллар ишинде эткен куллыгы акында хабарламага шакырды.
Асият Бадий кызы республикадынъ ямагат палатасына билимлендируьв профсоюзларынынъ район комитети атыннан сайланганын эм сонынъ куллыгында Ногай районынынъ ямагатынынъ ваькили болып катнасканын белгиледи. Ол сол уьш
йыл ишинде Орта-Тоьбе орта мектебининъ директоры, районнынъ ямагат палатасынынъ агзасы Сапиет Межитова эм тарих илмилер кандидаты, КДМИ куллыкшысы Арсланбек Адиев онынъ коьмекшилери болганы акында айтты эм оларга ак юрегиннен разылыгын билдирди.
Асият Манкаева сол уьш йыллар ишинде республикадынъ ямагат палатасында миллетлер ара эм динлер ара катнасувлар ислери бойынша комиссиясынынъ сырасында ислегенин айтты. «Быйыл меним сонда болувымнынъ болжалы кутылады. Мага эндиги де палата сырасында ислемеге кенъес этселер де, мен 9-ншы шакырувдынъ куллыгында катнаспаягымды билдирдим эм бу янъы
шакырувдынъ сырасында бизден янъы ваькил болар деп сенемен. Ондай аьдем бар, ол бизим ердесимиз – Арслан Бакиев, республикадынъ Аькимбасынынъ администрациясында тийисли сайлавды да оьткен», – деди А.Манкаева.
Ол оьзининъ соьзинде сол белгиленген уьш йыллар ишинде онынъ уьшин бизим районымыздынъ, халкымыздынъ яшавы ман байланыслы соравларды коьтеруьв эм шешуьв маьнели болганын билдирди. Регионнынъ ямагат палатасына келип ок
та А.Манкаева уллы ногай шаири Кадрия Темирбулатовадынъ 75 йыллыгы ман байланыслы шараларды оьткеруьв соравлары ман каьр шегип баслаган. Ол соьйтип регионнынъ ямагат палатасынынъ аркасы ман Махачкалада Кадриядынъ оьнер асабалыгына багысланган уьйкен тоьгерек столды аьзирлеп оьткеруьвди уйгынлаган.
Соны ман бирге ол ногай музейининъ меканынынъ аьли акында, Кадрияга багысланган шараларды оьткеруьв эм онынъ
атын Махачкаладагы орамлардынъ бирисине беруьв акында хатлар аьзирлеген. Ызгы сорав ман тек ол ялгыз тувыл, солай ок район администрациясы, ол замандагы ДР Авыл хозяйство эм азык-туьлик министри Мухтарбий Аджеков, ДР Халк Йыйынынынъ депутаты Мурзадин Авезов каьр шеккенлерин айтып белгиледи.
Асият Манкаева тагы да республика эм район бойынша оьткерилген коьп шараларда катнасканын, оьзининъ ойлары, сулыбы
эм билими мен боьлиспеге туьскени акында хабарлады.
Ол Ногай районынынъ ерлери, тувган ана тилди саклав, билимлендируьв учреждениелери эм авыл хозяйство тармагы уьшин кадрларды аьзирлев эм СВО катнасувшыларына ярдам этуьв мен байланыслы соравлардынъ маьнелигин белгиледи. «Бу
соравларды биз куллыгымыздынъ бас бетине салмага борышлымыз», – деди ол.
Эльмурза Саитов район ямагаты атыннан Асият Манкаевага коьпйыллык кайратлы куллыгы, муниципалитеттинъ эм республикадынъ ямагат яшавында белсен катнасувы уьшин уьйкен разылыгын билдирди.
Шарада Ногай район администрациясынынъ аькимбасынынъ орынбасары Рашид Шангереев те катнасты эм Асият Манкаевага разылык билдирип, ога ден савлык, куллыгында уьстинликлер йорады.
Ногай районынынъ Согыс, ис, Савытлы куьшлерининъ эм ыхтыяр саклавшы органларынынъ ветеранлар советининъ председатели Акманбет Сангишиев тувган миллет тилди саклав акында оьз ойларын эм маслагатларын айтты.
Кенъестинъ ызында Эльмурза Саитов шатлыклы аьлде ДР Ямагат палатасынынъ председатели Азизбек Черкесов атыннан язылган Разылык хатларды тапшырды. Коьпйыллык кайратлы эм етимисли куллыгы, иске инновационлык йорыкларын киргисткени, оьсип келеяткан несилди окытувда эм тербиялавда тийисли онъайлы эм кавыфсыз аьллерди туьзгени уьшин
С.Батыров атындагы саниятлар мектебининъ художестволык боьлигининъ етекшиси Алтын Акбердиева, Терекли-Мектеб А-Х.Джанибеков атындагы орта мектебининъ директоры Курасхан Ярикбаева эм Кадрия атындагы мектеб директоры Альфия Акимова сондай Разылык хатлар ман савгаландылар.
Асият Манкаева солай ок Орта-Тоьбе авыл мектебининъ директоры, Ногай районынынъ Ямагат палатасынынъ агзасы Сапиет
Межитовага да шешекей байламын савкатлады.
Шарады аьзирлевде эм уйгынлавда ТереклиМектеб авыл администрациясынынъ аькимбасы Марад Кулунчаковтынъ косымын
белгилемеге туьседи.
М-А.Ханов.
Суьвретте: кенъестинъ катнасувшылары.
