Мине алдымыздагы суьвретти мага Тарумов районынынъ АлександроНевское авылынынъ яшавшысы Зейнадиин Шугаиповтынъ кызы Зухра коьрсетти. Соны колыма алганлайын ок, мен халкымыздынъ айтылган шаири Гамзат Аджигельдиевтинъ юзине тигилип карадым – яп-яс Гамзат оьзининъ яп-яс тенълери Рашид Агаспаров эм Зейнадиин Шугаипов пан ТереклиМектеб авылдынъ орталык паркындагы олтыргышта. Суьвреттинъ артында «Терекли-Мектеб авылы, 1957-нши
йыл, 10-ншы класста» деп язылган.
Мен оьзим Зейнадиин Шугаиповты аьруьв таныйтаган эдим, сонъында ол меним ювыгым да болды. Ол мага бизим Гамзат пан Терекли-Мектеб интернатында турганы, мектебте окыган заманлары акында коьплеген хабарлар айткан. Онынъ эскеруьвлери бойынша Гамзат мектебте окыган йылларында ок тенъ-дослары арасында баскаланган – бек шугыл, соьйлемеге суьетаган, йорыгы ман сонда ок ятлав ойлап шыгаратаган эм соны сол еринде ок окыйтаган болган. Окувы да Гамзаттынъ баьри окув сабакларыннан да ийги эди.
Сонъында дослар мектебти кутарадылар. Гамзат Совет Аьскер сырасына кетеди эм, соннан кайтканда, Москва каласындагы Максим Горький атындагы Адабиат институтына окымага туьседи. Шаир биринши кере студент таркавларына ТереклиМектебке кайтканда, йол уьстиндеги Александро-Невское авылындагы Зейнадиин-досынынъ уьйине киреди эм сонда уьш куьн турады. Ол уьш куьн узагында досына эм авыл яшавшыларына оьзининъ язган ятлавларын аьлемет кепте окып, халкты тамашага калдырган. Зейнадиин айтканлай, авыл яшавшылары ога сукланып: «Кайдай талаплы, акыр эм акыллы яс Гамзат!» – дегенлер…
Сол дослыгын Зейнадиин Шугаипов оьлгенше дейим саклаган эм Гамзат Аджигелдиев акында мага не шаклы да кужырлы хабарлар айткан.
Сол уьш куьн ишинде шаир кешелерде турып, ятлавлар язып, соларды досына окыйтаган болган. Онынъ сондай оьнерине уьйдегилери де тамаша этетаган болыптылар.
Зейнадиин Шугаипов, мектебтен сонъ, авыл хозяйство институтын окып битирген эм коьп йыллар узагында туьрли ерлерде зоотехник кесписи бойынша ислеген. Ол аьр заман да ногайларга Гамзат Аджигельдиев акында тек ийги эскеруьвлерин айтып турган.
Бу суьвретке келеяткан 2027-нши йылда 70 йыл толады, эм ол бизге, ногайларга, бек баалы.
А.Култаев,
Дагестан Республикасынынъ Халк поэти.
Суьвретте: (солдан онъга) Рашид Агаспаров, Зейнадиин Шугаипов, Гамзат Аджигельдиев.
