Авыл ерде баьриси де бир аьелдей болып яшайдылар эм, биревдинъ уьйинде суьйиниш болса, баьри де оны ман бирге куванадылар. Суьйинишлер де, уьстинликлер де мунда ортак.
Ногай районымыздынъ почта куллыкшысы Аида Амитова элимиздинъ бас каласында озган шарада Дагестан Республикасын ваькиллегени, онынъ исине йогары белги берилуьви ис йолдаслары эм баьри таныганларды оьктемситпей болмады.
Янъыларда Россия Почтасынынъ, РФ Авыл хозяйствосынынъ, РФ Санлар оьрленуьвининъ байланысынынъ эм Коьлем коммуникациялар министерстволарынынъ, Россиядынъ байланыс тармагынынъ Профсоюз куллыкшыларынынъ коьтергишлеви мен «Российское село» федераллык проекти бойынша «Единая Россия» партиясынынъ уйгынлавы
ман «Земский почтальон-2026» Савлайроссиялык конкурсы озды.
Биринши кере мундай конкурс озган йыл оьткен эди. Белгиленген конкурсы почтальон кесписин таралтувга эм уьйкен болмаган
калаларда эм авылларда буйымлар толтыратаганлардынъ сырасында ийги дегенлерди савгалавга каратылды. Конкурста катнасув уьшин элимиздинъ 86 регионыннан 3000-нан артык аьризе туьсти.
Баслап онлайн аьлде тавыс беруьв юрди. Конкурстынъ регионаллык кезегинде бизим Аида Хизриевна енъуьвши болды. Сонъ ол Москва каласына конкурстынъ финалына шакыртылды. Мунда элимиздинъ туьрли регионларыннан баьриси 122 почтальонлар келген эдилер.
Тоьгерек столдынъ касында конкурс катнасувшылары соравларга явап бердилер. Онынъ сырагылары ман Аида Амитова элимиз
бойынша 13-нши орынды бийледи. Москвада почтальон хатын шоьлдеги аьдемлердинъ конаксуьерлиги, аьр бир уьйде почтальонларды йылы йолыгатаганы, олар ман кайгысын да, суьйиниш де боьлисетаганы акында айтып, ногай халкы ман йыйылганларды таныстырды. Акыйкатлай да, авыл еринде почтальон тек газета эм пенсия еткеретаган куллыкшы
болып калмайды. Олар кысы-язы ман, ямгырлы эм карлы куьнлерде аьдемлердинъ уьйлерине барадылар, керек болса, эслилердинъ юрегиндегин тынълаган, сенген аьдеми де боладылар. Бу ак ниетли аьрекетти бардырганлардынъ исининъ маьнеси уьйкен, сонда анълав, эситуьв эм каьр шегуьв де орын табатаганын «Единая Россия» Генсоветининъ секретари Владимир Якушев пачтальонларды савгалавга багысланган «Россия» Миллет орталыгында «Труженники села» форумы бойынша озган шарада белгилеген.
Аида Амитова почтальон исин 13 йылдан бери бардырады. Ол кишкей заманда аьдемлер кайтип хатлар караганын, аькелинген журналларга эм газеталарга авыл яшавшылары суьйингенин коьрип, аьдемлер куьткен эм суьйген почтальон болмага мырат эткен. Оьскенде де, онынъ аваслыгы йойытылмады. Хасавюрт каласыннан Терекли-Мектеб авылына келин болып туьскенде, Ногай шоьл онынъ тамыры, атабабаларынынъ тувган ери экенин сезгенин бу куьнлерде ол уьйкен суьйим мен айтады. Ногай
кыз Хасавюрт каласында тувып-оьсуьвининъ де тарихи бар. Онынъ атасы Ногай районыннан Хасавюрт каласына ислемеге кетип, уьйленеди эм сонда яшап калады. Коьп йыллардан сонъ онынъ уныклары атасынынъ тувган ерине кайтып келедилер.
Бу куьнлерде почтада ярасык юзли, юмсак сесли яс кыскаяклы аьдемлерди йылы йолыгады.
Ол аьр биревдинъ коьнъилине етип болады. Сондай кайратлыктынъ, йылувлыктынъ булагы этип Аида Хизриевна куллыгына каратылган суьйимин эм татым ис коллективин санайды. Биз оны Савлайроссиялык конкурсында катнасып, савгалы орынга тийисли болганы ман ак юректен кутлап, аьли де уьстинликлер йораймыз.
Нурият Кожаева.
Суьвретте: Баьтир партасын ашылув шарада.
