Патриотизм сезими кайбиримизде де бала заманнан алып кепленеди. Бизим несил Уллы Аталык согысынынъ ветеранларын коьрип, олардынъ хабарларын тынъламага уьлгирген наьсипли несил деп саналады. Буьгуьнлерде де, оькинишке, Аталыгымыз кыйынлы заманларга туьсип, эр кисилерге оьз борышын согыс аьллерде толтырмага туьседи. Аталыкты саклавшылар оьзлерин йигитлерше юритедилер, биревлери савлай дуныяда тынышлык болсын деп яс янларын аямайдылар. Солардынъ бириси – Терекли-Мектеб авылынынъ яшавшысы Рашидхан Солтанахмед увылы Ханмурзаев.
Онынъ йигитлиги аьр заманда да бизим юреклеримизде сакланаяк.
Рашидхан битирген Кадрия атындагы мектебте ердесимиздинъ Баьтир партасы ашылган. Савлай элимиз бойынша билимлендируьв учреждениелеринде «Единая Россия» партиясынынъ патриотлык «Баьтир партасы» проекти аьрекетлейди. Бу проект бизим белгили йигитлеримиздинъ эсин оьмирлетуьвге каратылган.
Кадрия атындагы мектеб Дагестан Республикасынынъ ат казанган окытувшысы, Россия Федерациясынынъ билимлендируьв эм
тербиялав бойынша сыйлы куллыкшысы Альфия Амирхан кызы Акимовадынъ етекшилеви астында баьри акцияларда да катнасады, окытувшылар гуманитарлык юклерди йыйнайдылар, СВО катнасувшылары эм олардынъ кардаш-тувганлары ман йолыгысадылар.
Соьйтип, шатлыклы аьлде Рашидхан Ханмурзаевтинъ «Баьтир партасы» мектебте ашылды. Кадрия атындагы мектебтинъ
выпускниги СВО еринде баьтирлерше согыскан эм ян берген.
Р.Ханмурзаев «Йигитлик орденине» (оьлгеннен сонъ) тийисли болган. Класстан тыс иси бойынша завучы Эльмира Савкатова
шарады юритти эм байракты коьтермеге ыхтыяр Рашидхан Ханмурзаевтинъ класс етекшиси Ису Аджиманбет кызы Валиевага эм карындасы Сеперхан Солтанахмед кызы Ханмурзаевага берилетаганын билдирди. Шарадынъ сыйлы конаклары болып «Ногайский район» МР аькимбасынынъ орынбасары Мурат Шадиев, Ногай районынынъ Согыс, ис, Савытлы куьшлер эм правосаклав органлар советининъ председатели Акманбет Сангишиев, Ногай районынынъ Билимлендируьв управлениесининъ етекшиси Амерхан Межитов, баьтирдинъ анасы Сакинат Ханмурзаева, онынъ карындаслары, кардаштувганлары келдилер.
Оьз соьйлевинде мектеб директоры Альфия Акимова Кадрия мектебининъ 28 выпускниги СВО катнасувшылары экенин оьктемлик пен айтты.
– Биз юреклеримизде саклаймыз тынышлык уьшин яшавларын курманлык эткен йигитлеримизди. Олардынъ эси дайымларга. Мен, элимиздинъ баьри яшавшыларындай болып, тезден енъуьв келер деп сенемен. Баьтирлеримиздинъ ата-аналары алдында басымызды иемиз, олар кайдай йигитлерди тербиялаганлар. Енъуьв бизики болар, – деди СВО катнасувшысынынъ хатыны Альфия Амирхан кызы.
Шарада катнасканлар бир тавыстан окытувшыларга, ата-анага сондай эркли аьскершиди тербиялаганы уьшин разылыгын билдирдилер.
Мундай шаралар маьнели эм керекли, неге десе яс несил сондай йигерли баьтирлерден коьрим алмага тийисли. Рашидханнынъ акында йылы соьзлер класс етекшиси эм бирге окыган тенълери айттылар.
Шарады юритуьвшилер Рашидхан Ханмурзаевтинъ яшав эм согыс йолы акында хабарладылар. Баьтир партасын ашпага ыхтыяр мектеб директоры Альфия Акимовага эм Рашидханнынъ анасы Сакинат Ханмурзаевага берилди.
Окувшылар баьтирдинъ карындасы аданасына язган ятлавды окыдылар. Алтынай Солтанахмед кызы шарады уйгынлавшыларга, окытувшыларга Рашидхан аданасын эсинде саклап, сый эткени уьшин разылыгын билдирди. Сонъ
бизим парахатлыгымыз, таза аспанымыз уьшин ян бергенлердинъ сыйына уьндемев такыйка оьтти.
«Баьтир партасы» проекттинъ бас ниети – яс несилде Россиядынъ аьлиги эм аьвелги баьтирлигине, тарих асабалыгына сый
эндируьв, тербиялав. Кадрия атындагы мектебте Уллы Аталык баьтирлерин, аьскершиинтернационалистлерин, согыс аьрекетининъ ветеранларын, СВО катнасувшыларын коьрим этип, окувшыларда патриотлык сезимлер, Аталыкка суьйим эм кыйынлы заманда Аталыкты саклавга аьзирликти тербиялайдылар. Сол да кайдай уллы эм маьнели аьрекет.
Г.Бекмуратова. Суьвретте: Баьтир партасын ашылув шарада.
