Янъыларда савлай Россия бойынша выпускниклердинъ мектеб пен аманласув кешлиги шатлыклы аьлде байрамшыланып озды. Аьр бир выпускникке сайлаган кеспилери бойынша окув ошакларына туьспеге, билим алмага, оьз йолларын сайлав заманы келди.
Патшалык сынавды тийисли оьткен, талаплы, шалыскыр кызлардынъ бириси болады Мутаирова Айза Муратовна. Айза – асылы ман Ногай районынынъ Кумлы авылыннан. Бала шагыннан алып кыз алыс Мурманск областиндеги Островной каласында аьели мен яшайды. Сол каласында орынласкан аьскер боьлигинде онынъ атасы Мурат Эльгайтарович коьп йыллардан бери
конкракт бойынша кызмет этип, мектебте анасы Эльмира Уллубиевна английс тилиннен окытувшы, педагог-уйгынлавшы
болып аьрекетлеп келедилер.
Островной каладынъ баслап 1-нши номерли балалар бавында, оннан сонъ, 2015-нши йыл 284-нши номерли мектебке барып, сонда 11-нши классты окып тамамлады. Айзадынъ бала шагыннан алып китап окымага, ясамага, йырламага, бисерлер мен сокпага уьйкен аваслыгы бар. Бу йыл шалыскыр кызалак 2026-ншы йылдынъ Г.А.Друженьков атындагы баргы лауреаты да болды.
Мектеб яшавынынъ белсенли катнасувшысы Айза йыл сайын туьрли окув сабакларыннан мектеб, муниципаллык олимпиадаларда ортакшылык этип, коьп кере енъуьвши орынларын алып келген. Ол «Добро. РФ» проектинде де волонтер
эсабында белсенли катнасып келеди. Солай болып, ол «Движение Первых» Россия балалар эм яслар козгалысынынъ
катнасувшысы да болады. Айза – туьрли шаралар, олимпиадалар, конкурслар катнасувшысы, коьплеген Сый грамоталарынынъ иеси. Эки йыл артта Айза 9-ншы классты кызыл аттестат шайытламасына тамамлаган эди. Бу йыл да кыз, химия, биология эм баска окув сабакларыннан патшалык сынавларында йогары тамамларын коьрсетип, алтын медалине тийисли болды. Алтын медали – ол тек савга болып калмай, куллыксуьерликтинъ, мырадына ымтылувдынъ, билимге шынты суьйимнинъ белгиси болады.
Аьр бир алган «бес» белгиси – ол саьатлеп тиресуьвли аьрекетлев, авырлыкты оьтуьвде, бир затка да аьвликпей, карамай,
сенимли алдыга барув. Буьгуьнлерде Айзадынъ етимисине онынъ тувган авылы, билим берген мектеби, окытувшылары, тетеси Мадина, энеси Кизлярхан, ата-анасы Мурат эм Эльмира бек оьктемсийдилер.
Айзадынъ бала шактан врач кесписин сайлап, аьдемлерди эмлемеге уьйкен мырады бар.
Сол мырады яшавга шыгарылмага заман да етти. Шалыскыр кызга сайлаган мырадына етисип, келеекте де йолында уьйкен етимислер, янъы бийикликлер, енъуьвлер коьп болганын йораймыз! Айза, алдыга барувда йолынъ дайым ашык болсын!
Г.Нурдинова.
Суьвретте: Айза Мутаирова.
